Նոյեմբեր 30-էն Դեկտեմբեր 2, Լեհաստանի Զապժէ քաղաքի Guido հանքավայր թանգարանի դահլիճին մէջ տեղի ունեցած է Հայ մշակոյթի առաջին փառատօնը։ Բացման արարողութեան պատուոյ հիւրերը եւ հանդիսականները ողջունած է կազմակերպիչ, Հայ լեհական հասարակական կոմիտէի նախագահ, Զապժէի մէջ  Հայաստանի Հանրապետութեան պատուոյ հիւպատոս Հրաչեայ Բոյաջեան։

Փառատօնի առաջին օրը հնչած են հայկական դասական երաժշտութիւն՝ սրինգով ու դուդուկով, ինչպէս նաեւ հայկական ծագումով լեհ երաժիշտներու գործեր, իսկ երկրորդ օրը ներկայացուած են հայկական ժողովրդական եւ ազգային երգեր, երաժշտական կատարումներ։ Մշակութային ծրագրի առաջին օրուան համերգին մասնակցած են հայ եւ լեհ երաժիշտներ՝ Փիոթր Օչքովսքի, Անի Մելտոնեան, Նելլի Մարտիրոսեան, ինչպէս նաեւ Սարգիս Դաւթեանի «Armenian Folk Project» եւ «ՀաբիԱրՋան» երաժշտական համոյթները։

Համերգային բաժնի աւարտէն ետք, մասնակիցներուն հրամցուած է հայկական խոհանոցը։   

Նշենք, թէ փառատօնի կազմակերպիչն էր Լեհաստանի Հայ-լեհական հասարակական կոմիտէն՝ Լեհաստանի Ներքին գործոց նախարարութեան և տեղական վարչակազմի նիւթական աջակցութեամբ։