Օգոստոս 10-ին, Սիւնիքի մարզի Տեղ գիւղին մէջ տեղի ունեցած է «գիւղի օր»-ուան նուիրուած տօնական հանդիսութիւնը։

Ձեռնարկը ծայր առած է Տեղ գիւղի վաղ-միջնադարեան Սուրբ Գէորգ եկեղեցւոյ մէջ կատարուած ժամերգութեամբ, որուն յաջորդած է հերոսներու զբօսայգիին մէջ զօրավար Անդրանիկի կիսանդրիի բացման հանդիսաւոր արարողութիւնը։

Կիսանդրիի գաղափարի հեղինակն ու աշխատանքները կազմակերպողն է «Հայկական նախագիծ» գիտակրթական հասարակական կազմակերպութեան համահիմնադիր, քաղաքագէտ Էդգար Էլբակեան։

Կիսանդրիի ստեղծման աշխատանքները սկսած են 2019-ին եւ կարելի դարձած 97 նուիրատուներու միջոցներով։ Ի սկզբանէ նախատեսուած էր կիսանդրին տեղադրել Արցախի հանրապետութեան Քաշաթաղի շրջանի Մարքիզ լեռան վրայ, որ 1918 Դեկտեմբեր 1-ին, դէպի Շուշի արշաւանքի ընթացքին ազատագրուած էր զօրավար Անդրանիկի ուժերուն կողմէ։ Սակայն 2020-ի Արցախեան երրորդ պատերազմէն եւ Քաշաթաղի բռնագրաւումէն ետք, անկարելի դարձած էր նախանշուած վայրին մէջ կիսանդրիին տեղադրումը։

Այս կապակցութեամբ դիմելով Տեղի բնակիչներուն՝ Է․ Էլբակեան իր խօսքին մէջ ընդգծած է․ «Այս ազգային մասունքը առժամեայ ձեզ ի պահ յանձնելը նաեւ պարտականութիւն է ձեզ համար՝ ձեր օրինակով՝ իբրեւ այսօրուան դրութեամբ սահմանապահ, ապացուցելու, որ մեր հերոսներուն պայքարը ի զուր չէ եղած։ Պարտականութիւն է Անդրանիկի անցած ճանապարհի, Արցախեան առաջին պատերազմի յաղթական ճամբան կերտողներուն առջեւ ՝ առ այն, որ անոնց գործը երբեք կիսատ պիտի չմնայ»։

Կիսանդրիի քանդակագործն է գորիսաբնակ Յարութիւն Համբարչեան։