Օգոստոս 29-ին, Հայաստանի Քննչական յանձնախումբը պաշտօնապէս հաստատած է, թէ Արտաքին գործոց (ԱԳ) նախարարութեան աշխատակցի մը նկատմամբ պետական դաւաճանութեան արարքի պատճառով քրէական հետապնդման նախաձեռնած է եւ զայն բանտարկած։ Միեւնոյն ատեն, յանձնախումբը հերքած է լրասփիւռներու հրապարակած տեղեկութիւնները, թէ ենթական բարձրաստիճան պաշտօնեայ կամ հիւպատոս եղած է։

Ի՞նչ կը գրեն լրասփիւռները

Նախապէս «Հրապարակ» թերթը գրած էր, թէ շուրջ երկու ամիս առաջ Ազերպայճանի ի նպաստ լրտեսութեան կասկածանքով ձերբակալուած է Աւստրիոյ մէջ Հայաստանի հիւպատոս Աշխէն Ալեքսանեան։ Factor.am եւս, յղում ընելով իր աղբիւրներուն, նշած էր նոյն անունը՝ աւելցնելով, թէ ենթական սիրային կապ ունեցած է ազերպայճանցիի մը հետ, որուն հաղորդած է կարեւոր տեղեկութիւններ եւ ձերբակալուած է «Զուարթնոց» օդակայանէն՝ Վիեննա մեկնելու ատեն։

Յանձնախումբը փաստօրէն հերքած է ձերբակալուածին պաշտօնի մասին լրասփիւռներու հրապարակած տեղեկութիւնը՝ առանց սակայն նշելու անոր անունը և վարած յստակ պաշտօնը։