Փարիզի մէջ Յունիս 14-17 տեղի ունեցող Եւրոպայի արհեստագիտական ամենամեծ ձեռնարկներէն մէկուն՝ «VivaTech-2023» 7-րդ տարեկան միջազգային ցուցահանդէսին կը մասնակցին հայկական 10 սթարթափեր։
Հայաստանի Բարձր արհեստագիտութիւններու արդիւնաբերութեան նախարարութեան հրապարակած հաղորդագրութեան մէջ կ՚ըսուի, որ նկատի ունենալով ցուցահանդէսին համբաւը տարածաշրջանին եւ միջազգային հարթակներուն վրայ, ինչպէս նաեւ հայկական ընկերութիւններու արձանագրած յաջողութիւնները «VivaTech 2022»-ի ընթացքին` Նախարարութիւնը այս տարի եւս կարելիութիւն ընձեռած է ոլորտի ընկերութիւններուն եւ միութիւններուն մասնակցելու ցուցահանդէսին եւ ներկայացնելու իրենց նորարարական լուծումներն ու արտադրութիւնները «Հայաստան» միասնական տաղաւարի ներքոյ:
Հայկական արհեստագիտական ընկերութիւնները կը ցուցադրեն ոլորտի ներուժն ու նուաճումները առողջապահական, կրթական, ձայնային արհեստագիտութիւններու, երաժշտական տեսողականութեան, ճարտարագիտութեան, ծրագրային եւ սարքային ապահովման, առցանց գնումներու եւ վճարումներու, ելեկտրոնայինի, արհեստական բանականութեան եւ այլ ոլորտներու մէջ: Այս տարի ցուցահանդէսին կը մասնակցին «ՎիԱռԴրոբ», «Ադեվից», «ԴուՎորք Թեք», «ԷյԹի», «Դուդուկ», «ՖԲՖ», «Բլիինք», «ԵԻԱ ինժեներինգ», «Թեքստ Էնդ Փեյ Մի» ընկերութիւնները եւ «Առաջատար տեխնոլոգիաների ձեռնարկութիւնների միութիւն»-ը (ԱՏՁՄ) «Արմաթ» ծրագրով:
