Քանի մը օր առաջ, Հայոց ցեղասպանութեան թանգարան-հիմնարկին նուիրուած է  նշանաւոր հայդուկ Գէորգ Չաուշի այրիին՝ Հեղինէ (Եղսօ) Չաուշի բնատիպ լուսանկարը։ Նուիրատուն՝ Մուրատ Ուչաներ, լուսանկարը պատահաբար յայտնաբերած է 2005-ին, Այնթապի պատմական թաղամասերէն մէկուն մէջ հին տան մը վերականգնման աշխատանքներու ատեն, պատի թաքստոցէն։

Լուսանկարին մէջ Հեղինէ Չաուշի մէկ ձեռքին ատրճանակ կայ, միւսին՝ հրացան, կուրծքին եւ գօտիին կապուած են փամփշտակալներ։ Լուսանկարը քաշուած է ամուսնոյն մահէն ետք, 1910-ին, Այնթապի՝ “M. H. Halladjian” լուսանկարչատան մէջ։

Լուսանկարի դարձերեսին ձեռագիր ընծայագիր կայ․ «Հանգուցեալ հերոս Գէորգ Չաուշի տիկին այրի Հեղինէ։ Մեր յիշատակի նուէրը [անընթեռնելի բառ] Տիար Յովհաննէս եւ տիկին Փիդանեան․ 21 Յուլիս, 1910, Հ․Յ․Դ․, Այնթապ»։