24-ամեայ Ներսէսն ու տասը այլ երիտասարդներ նախագծած եւ պատրաստած են անօդաչու սարքի խելացի ռումբ՝ արհեստական բանականութեամբ, տեսախցիկով եւ թեւերով։
NEWS.am Tech-ի հետ զրոյցին Ներսէս պատմած է, որ ռումբը նախատեսուած է անօդաչու սարքի տակ ամրացուելու համար.-
«Օժտուած է արհեստական բանականութեամբ։ Առջեւի բաժնին մէջ ունի տեսախցիկ, իսկ ետեւի կողմը ամրացուած են թռիչքի կառավարման համար թեւերը կամ ղեկերը։
Աշխատանքի սկզբունքը հետեւեալն է. ռումբը հեռավարողը կրնայ ռումբի տեսախցիկին միջոցով փնտռել, յայտնաբերել, սեւեռել թիրախը, եւ յարմար պահուն արձակել զայն։ Խելացի ռումբը ինքնակառավարուելով՝ կը թռի դէպի թիրախն ու կը հարուածէ։
Ունի բաւական մեծ ճշգրտութիւն, կը հարուածէ թիրախը մօտաւորապէս կեդրոնէն 3 մեթր շառաւիղով ճշգրտութեամբ. այսինքն՝ եղած են նոյնիսկ այնպիսի դէպքեր, երբ հարուածած է անմիջապէս թիրախին կեդրոնը. եթէ ան հրասայլ ըլլար, պիտի կարենայինք համարել, որ ան ինկած է հրասայլի կափարիչին մէջ»։
Ներսէս պատմած է, որ աշխատանքը բաւական բարդ եղած է ու երկարատեւ՝ շուրջ 3 տարի։ Անոր համաձայն՝ ռումբին մէջ արհեստական բանականութիւնը նախատեսուած է թռիչքի ընթացքին թիրախը ճանչնալու եւ չկորսնցնելու համար.-
«Քանի որ անօդաչու սարքը՝ ինք ռազմական եզրով այսպէս կոչուած՝ «արձակէ ու մոռցիր» տեսակէն է,– ինչ որ կը նշանակէ, թէ անոր արձակուելէն ետք, ո՛չ ռումբը հեռավարողը, ո՛չ հակառակորդը անոր հետ կապ կրնայ հաստատել, որովհետեւ ան իր մէջ չունի հաղորդակցութեան որեւէ տեսակի ալեհաւաք սարքաւորում եւ կառավարման միջոց, այլ ամբողջովին ինքնակառավարուող է»։
Մանրամասնութիւնները՝ տեսանիւթին մէջ.-
