«Գերաշնորհ Միքայէլ արքեպիսկոպոս Աջապահեանի եւ ազգային բարերար Սամուէլ Կարապետեանի կալանքի ժամանակը երկարաձգելու որոշումներով դատարանը հերթական անգամ ոտնահարեց արդարադատութիւնը՝ կրկին պարզորոշ դարձնելով  իշխող քաղաքական ուժից դատարանների լիակատար կախեալ լինելը:

Նման անհիմն որոշումներով արդարադատութիւնը ձեռք է բերում պատժիչ նշանակութիւն, իսկ դատարանները վերածւում են ազատ խօսքի եւ կրօնի ազատութեան բռնաճնշման գործիքի:

Այսպիսի գործելաոճը բնորոշ է ամբողջատիրական համակարգերին եւ աղերս չունի իշխանութիւնների կողմից տարփողուող ժողովրդավարական արժէքների հետ:

Եկեղեցու, եկեղեցականների եւ եկեղեցու աջակիցների նկատմամբ կիրառուող բռնաճնշումները եւ տեղեկատուական ահաբեկչութեան միջոցները չեն կարող լռեցնել խղճի եւ արդարութեան ձայնը: 

Միքայէլ արքեպիսկոպոս Աջապահեանի եւ ազգային բարերար Սամուէլ  Կարապետեանի իրաւունքները պէտք է անյապաղ վերականգնուեն, բացառուի ապօրինի հետապնդումը եւ նրանք պէտք է անմիջապէս ազատ արձակուեն կալանքից:

Մայր Աթոռ Սուրբ Էջմիածին

2025 Օգոստոս 15»