Գերագոյն Հոգեւոր խորհուրդի յայտարարութիւնը
Մայիս 23-ին, Մայր Աթոռ Սուրբ Էջմիածնի մէջ, նախագահութեամբ Գարեգին Բ. Ամենայն Հայոց կաթողիկոսի, տեղի ունեցած է Գերագոյն Հոգեւոր խորհուրդի ժողովը, որուն մասնակցած են նաեւ Մայր Աթոռի վանաբնակ եպիսկոպոսները: Ժողովիի քննարկուած են Հայաստանի եւ Արցախի առջեւ ծառացած մարտահրաւէրները։ Ժողովը անդրադարձած է նաեւ հայ-ազերպայճանական բանակցային գործընթացի առնչութեամբ օրերս կատարուած յայտարարութիւններուն:
Նիստի աւարտին, Գերագոյն Հոգեւոր խորհուրդը հանդէս եկած է յայտարարութեամբ.
«Հայաստանի ու Արցախի ազատ ու անկախ կեանքի տեսլականը վերջին երեքուկէս տասնամեակների ընթացքում իրականութիւն է դարձել աշխարհասփիւռ մեր ժողովրդի հերոսական պայքարի, զոհողութիւնների ու յանձնառութիւնների շնորհիւ: Հայրենեաց պաշտպան մեր նահատակ զաւակների սխրանքն ու լուսավառ օրինակը ամուր են պահել մեր ժողովրդի ոգին` դիմակայելու ամէն նեղութեան, շարունակելու հայրենի հողի վրայ իր պատմական ներկայութիւնը:
Արցախեան 44-օրեայ պատերազմի ողբերգական հետեւանքները մեր հայրենիքը կանգնեցրեցին անվտանգային նոր մարտահրաւէրների, գոյաբանական սպառնալիքի առջեւ, սակայն նոյնիսկ այդ բարդ իրավիճակում չնուազեց մեր ժողովրդի եւ ազգային հաստատութիւնների նախանձախնդրութիւնը` շարունակելու պաշտպանել Հայաստանի ու Արցախի արդար իրաւունքները:
Հայաստանի վարչապետ Նիկոլ Փաշինեանի Մայիս 22-ի ասուլիսի ընթացքում հնչած յայտարարութիւնները բացայայտեցին հանրութեանը մատուցուող խաղաղութեան օրակարգի իրական բովանդակութիւնը, որով ակնյայտ են դառնում Արցախի հետագայ ճակատագրի եւ Հայաստանի սահմանամերձ որոշակի տարածքների առնչութեամբ Հայաստանի բանակցային գործընթացում իշխանութիւնների որդեգրած վտանգաւոր ու մերժելի դիրքորոշումները:
Գերագոյն Հոգեւոր խորհուրդը դատապարտելի եւ անընդունելի է նկատում խաղաղութեան պատրուակով «հիմնաւորուող» միակողմանի զիջումները: Ձեռնարկուող անհեռատես քայլերով, Արցախի Հանրապետութիւնը Ադրբեջանի կազմում ճանաչելով` Հայաստանի իշխանութիւնները Արցախի մեր քոյրերին ու եղբայրներին անխուսափելիօրէն կը կանգնեցնեն նոր ցեղասպանութեան եւ հայրենազրկման առջեւ: Մեր զաւակների արեան գնով ու մաքառումով կերտուած Արցախի անկախութիւնը, Հայաստանի տարածքները ենթակայ չեն սակարկութիւնների: Հայրենիքը ամէնքինս է, եւ հայրենիքին առնչուող նման որոշումները պէտք է կայացուեն Հայաստանի Սահմանադրութեան հիմնարար դրոյթներին եւ օրէնսդրութեանը համահունչ եւ ոչ` առանձին քաղաքական խմբերի ու խմբաւորումների հայեցողութեամբ:
Յորդորում ենք իշխանութիւններին` հրաժարուել պարտուողական մտայնութիւնից եւ դրանից բխող կործանարար քայլերից, համազգային մարտահրաւէրների յաղթահարման համար գտնել խելամիտ ու արժանապատիւ լուծումներ: Մեր կոչն ենք ուղղում համայն մեր ժողովրդին, ազգային կառոյցներին օրհասական այս պահին ողջախոհութեամբ սթափ գնահատելու ստեղծուած բարդ կացութիւնը եւ աննահանջ ու միաբան մնալու մեր համազգային շահերի, Արցախի ինքնորոշման իրացուած իրաւունքի հետապնդման գործում: Այս հարցում անհրաժեշտ ենք նկատում մեր ժողովրդի վճռական կամարտայայտութիւնը:
Խաղաղութիւն մեր հայրենիքին, ապահով ու անվտանգ կեանք համայն մեր ժողովրդին ի Հայաստան, յԱրցախ եւ ի սփիւռս»:
