Հայաստանի Աթէնքի դեսպանութեան նախաձեռնութեամբ եւ Կրթութեան, գիտութեան, մշակոյթի ու մարզանքի (ԿԳՄՄ) նախարարութեան աջակցութեամբ, Յուլիս 22-ին, մայրաքաղաքի երաժշտանոցի դահլիճին մէջ տեղի ունեցած է Հնագոյն երաժշտութեան «Տաղարան» համոյթի բացառիկ համերգը, ղեկավարութեամբ Սեդրակ Երկանեանի։

Համոյթը ներկայացուցած է պառոք եւ հայկական երաժշտութիւն։

Համերգին ներկայ եղած են աշխատանքային այցով Յունաստան գտնուող ԿԳՄՄ նախարար Ժաննա Անդրէասեան, Յունաստանի Մշակոյթի նախարար Լինա Մենտոնի, յունահայ համայնքի ներկայացուցիչներ, երաժշտասէրներ։

Մշակոյթի նախարարութիւններու միջեւ ստորագրուած են գործակցութեան յուշագրեր

Յուլիս 23-ին, Ժաննա Անդրէասեանի եւ Լինա Մենտոնիի միջեւ կայացած հանդիպումին քննարկուած են մշակոյթի բնագաւառին մէջ փոխանակման ծրագրերու, միջթանգարանային համագործակցութեան, երկու երկիրներու տարածքին մշակոյթի օրերու կազմակերպման, միատեղ ցուցահանդէսներու եւ ֆիլմարտադրութեան նախագծերու, մշակութային ժառանգութեան պահպանման, կառավարման կալուածէն ներս փորձառութեան փոխանակման վերաբերող հարցեր:

Հանդիպումին յաջորդած է երկկողմ գործակցութեան առնչուող յուշագրերու ստորագրութեան արարողութիւնը։