«Envoy» ամսագրին տուած հարցազրոյցին՝ Ազերպայճանի Արտաքին գործոց (ԱԳ) նախարարութեան մամլոյ քարտուղար Այխան Հաճիզատէ յայտնած է, թէ Հայաստանի տրամադրած ականապատ տարածքներու քարտէսներուն ճշգրտութիւնը 25 տոկոս է:

“Միջազգային ճնշումներէ ետք, Հայաստան տրամադրեց որոշ քարտէսներ, սակայն անոնք ընդամէնը 25 տոկոսով ճշգրիտ էին: Վերջին դէպքերու (ականներու պայթումներու) աւելի քան 55 տոկոսը տեղի ունեցած է այդ քարտէսներուն մէջ չընդգրկուած տարածքներու մէջ”,– նշած է Հաճիզատէ՝ աւելցնելով, թէ Հայաստանի քարտէսները ցոյց կու տան շուրջ 400 հազար ականներու տեղադրման վայրերը, սակայն իրական թիւը ըստ իրեն՝ շուրջ 1,5 միլիոն է։

Ան շեշտած է, թէ Պաքու կ՚ակնկալէ, որ «Երեւան տրամադրէ բոլոր ականապատ տարածքներու ճշգրիտ քարտէսները, որ պիտի ապահովէ ներքին տեղահանուածներու անվտանգ վերադարձը եւ վնասուած շրջաններու վերակառուցումը»։