Օգոստոս 25-ին, Քաջարանի սիրտը հանդիսացող Փուխրուտ գիւղի բարձունքին վրայ նոր շունչ առած է դարերու հաւատքն ու աւանդութիւնը։ Երկարատեւ շինարարական աշխատանքներէ ետք, գիւղի հին ու նոր սերունդները համախմբող սրբավայրի դռները կրկին բացուած են։

Նոյն օրը տեղի ունեցած է Սուրբ Ստեփանոս Նախավկայ եկեղեցւոյ օծման հանդիսաւոր արարողութիւնը։ Թեմի առաջնորդ Մակար եպիսկոպոս Յակոբեանի աղօթքով եւ հոգեւոր դասի մասնակցութեամբ եկեղեցին լեցուած է խունկի բոյրով ու մոմի լոյսով։ Հնչած սաղմոսներն ու ժամերգութիւնը գիւղի քարերուն տուած են հոգեւոր շող, իսկ պատարագի պահուն իւրաքանչիւրը զգացած է, թէ ինչպէս հաւատքը կրկին կ՚արմատաւորուի համայնքի կեանքին մէջ։

Առաջնորդ սրբազանը սրբալոյս միւռոնով օծած է եկեղեցւոյ սիւները, սուրբ սեղանը, մկրտութեան աւազանը: 

Բնակիչներուն ջանքերով նորոգուած ու վերաբացուած է Փուխրուտի միակ սրբատեղին, որ վերապրած է խորհրդային հալածանքը: Եկեղեցին նորոգութեան եւ վերաբացման նախաձեռնողն է այժմ Ս. Փեթերսպուրկ բնակող, փուխրուտցի բժիշկ Արմէն Աւետիսեան։

Տօնական մթնոլորտը շարունակուած է եկեղեցւոյ շրջափակին մէջ, ուր երիտասարդներն ու երեխաները հանդէս եկած են երգով ու պարով։

Այնուհետեւ, համայնքապետ Մանուէլ Փարամազեանի ձեռամբ մատաղ բաժնուած է ներկաներուն, ի նշան միասնականութեան ու սիրոյ։