Մայր Աթոռ Սուրբ Էջմիածնի թանգարաններու եւ արխիւի տնօրէն Ասողիկ աբեղայ Կարապետեան կը տեղեկացնէ, թէ Տիրոջ ողորմութեամբ եւ Գարեգին Բ. վեհափառ հայրապետի օրհնութեամբ կը վերաբացուի Սուրբ Էջմիածնի մայր տաճարի աւանդատուն-թանգարանը: Եւ այս առիթով, առաջին անգամ կը ցուցադրուի նաեւ Կենաց փայտին մասունքը ամփոփող խաչ-մասունքարանը, որուն մէջ զետեղուած է 7-րդ դարու խաչը (պատմութեան մէջ յայտնի Հացունեաց խաչ անունով)։

Հայր Ասողիկի համաձայն՝ ոսկեայ այս խաչը պատկանած է Սիւնեաց Բիւրեղ իշխանուհիին, որուն մէջ ամփոփուած է Քրիստոս Աստուծոյ խաչափայտի մասունքը՝ իշխանուհիի իսկ խնդրանքով տրուած Բիւզանդիոնի Հերակլիոս Ա. կայսեր կողմէ, երբ 627-ին Խաչափայտը, ազատագրուելով պարսից գերութենէ,  հայոց աշխարհով տարուած է Կ. Պոլիս, ապա՝ Երուսաղէմ: 1846-ին, իշխանուհիին խաչը ամրացուած է Վան պատրաստուած սքանչելազարդ խաչ-մասունքարանին մէջ՝ պահուելով Լիմ անապատի Սուրբ Գէորգ եկեղեցւոյ մէջ:

“Բանիմաց հայ հոգեւորականներու շնորհիւ Հայոց ցեղասպանութենէն հրաշքով փրկուած գանձերէն է, որ այլեւս սրբութեամբ պէտք պահուի ամբողջ հայութեան հոգեւոր կեդրոն Մայր Աթոռ Սուրբ Էջմիածնի մէջ: Շատ շուտով, սիրելինե՛ր, դուք ալ երջանկութիւնը պիտի ունենաք տեսնելու եւ խոնարհելու այս հրաշափառ աստուածային մասունքին առջեւ”,– յայտնած է Ասողիկ աբեղայ Կարապետեան։