Շուրջ ամիս մը առաջ, մեծ հրդեհի վտանգին ենթակայ էր Քեսապը: Այդ օրերուն հրդեհը Քեսապի դռներուն մօտ էր. սակայն այս անգամ անզսպելի հրդեհը մուտք գործած է քաղաք: Մեծ թիւով հայ ընտանիքներ ստիպուած հեռացած են իրենց տուներէն:

Մեծի Տանն Կիլիկիոյ կաթողիկոսութեան Cilicia TV-ի դիմագիրքի էջէն կը տեղեկանանք, թէ Արամ Ա. Վեհափառ հայրապետը մնայուն կապի մէջ է Քեսապի հոգեւոր տեսուչ Եսայի վրդ. Էօրտէքեանի եւ Բերիոյ Հայոց թեմի պատասխանատուներուն հետ։ Օգոստոս 15-ին, վերջիններս տեղեկացուցած են, թէ հրդեհը մեծ չափով հակակշիռի տակ առնուած է:

Լաթաքիոյ նահանգապետը եւ պետական պաշտօնատարներ այցելած են Քեսապ եւ իրենց զօրակցութիւնը յայտնած քեսապահայութեան:

Լաթաքիոյ նահանգապետին համաձայն՝ Քեսապի հրդեհները վերահսկողութեան տակ են

Օգոստոս 16-ին, Լաթաքիոյ նահանգապետ Մուհամմետ Օսման յայտնած է, թէ հրշէջներն ու քաղաքային պաշտպանութեան ջոկատները յաջողած են Քեսապի մէջ ծագած հրդեհները շիջանել։ Ան աւելցուցած է, թէ ներկայիս աշխատանք կը տարուի տարածքներու  զովացման համար՝ հաստատելով, որ իրավիճակը հսկողութեան տակ է։