Վարչապետ Նիկոլ Փաշինեան՝ կողակցին Աննա Յակոբեանի եւ աղջկան հետ, Օգոստոս 31-ին աշխատանքային այցով ժամանած է Չինաստան:

Նոյն օրը, Թիանճին քաղաքին մէջ վարչապետը հանդիպում ունեցած է Չինաստանի նախագահ Ցի Ճինկփինկի հետ։ Վերջինս արժեւորած է երկու երկիրներու միջեւ առկայ բազմադարեայ բարեկամական յարաբերութիւնները, շեշտելով թէ Չինաստան անվերապահօրէն կ՚աջակցի Հայաստանի անկախութեան, ինքնիշխանութեան ու տարածքային ամբողջականութեան։ Անդրադառնալով երկկողմ յարաբերութիւններու զարգացման հեռանկարներուն` ան ընդգծած է Հայաստանի հետ տնտեսական համագործակցութեան միջկառավարական յանձնախումբին աշխուժ գործունէութիւնը:

Իր կարգին Փաշինեան վերահաստատած է Հայաստանի աջակցութիւնը «Մէկ Չինաստան» սկզբունքին: Ան ըսած է, թէ տարածաշրջանային եւ միջտարածաշրջանային կայունութեան ուղղուած կառավարութեան կողմէ մշակուած «Խաղաղութեան խաչմերուկ» ծրագրին իրագործումը կրնայ շաղկապուիլ նաեւ Չինաստանի «Գօտի եւ ճանապարհ» նախաձեռնութեան հետ, որուն Հայաստան պաշտօնապէս միացած է։ Վարչապետը շեշտած է, որ իր կառավարութիւնը շահագրգռուած է չինական ընկերութիւններուն կողմէ Հայաստանի ներդրումային ծրագրերու ընդլայնումին:

Նիկոլ Փաշինեան վերահաստատած է Հայաստանի փափաքը` անդամակցելու Շանկհայի համագործակցութեան կազմակերպութեան:

Հանդիպումին երկու երկիրներու առաջնորդները կարեւոր նկատած են գործակցութեան խթանումը նաեւ գիտութեան, կրթութեան, մշակոյթի, զբօսաշրջութեան, տեղեկատւութեան, չափագիտութեան եւ այլ բնագաւառներուն մէջ:

Աւարտին, կողմերը յայտարարած են, թէ Հայաստանի եւ Չինաստանի միջեւ կը հաստատուի ռազմավարական գործընկերութիւն:

Իր այցի շրջանակին մէջ, վարչապետ Փաշինեան պիտի մասնակցի նաեւ Շանկհայի համագործակցութեան կազմակերպութեան վեհաժողովին եւ այլ աշխատաժողովներուն։