Օգոստոս 19-ին, վարչապետ Նիկոլ Փաշինեան հիւրընկալած է պաշտօնական այցով Հայաստան ժամանած Իրանի նախագահ Մասուտ Փեզեշքեանը: Նախ տեղի ունեցած է դիմաւորման արարողութիւնը եւ այդ շրջանակին մէջ հնչած են Հայաստանի եւ Իրանի փառերգերը, այնուհետեւ երկու երկիրներու ղեկավարները հանդիպում ունեցած են՝ սկիզբը առանձին, ապա՝ ընդլայնուած կազմերով:

Զրուցակիցները քննարկած են Հայաստան-Իրան համագործակցութեան օրակարգային հարցեր, յատկապէս անդրադառնալով շարք մը բնագաւառներու մէջ երկուստեք կապերու զարգացման եւ ընդլայնման նիւթերուն։

Աւարտին, Փաշինեանի եւ Փեզեշքեանի ներկայութեան տեղի ունեցած է երկու երկիրներու միջեւ փաստաթուղթերու ստորագրութեան արարողութիւնը։ Ստորագրուած են քաղաքական խորհրդակցութիւններու, զբօսաշրջութեան, մասնագիտական կրթութեան, քաղաքաշինութեան եւ շինարարութեան, առողջապահութեան եւ բժշկական արտադրանքի, ազգային գրադարաններու եւ արխիւներու, թանգարանային համագործակցութեան եւ շարժարուեստի բնագաւառներուն մէջ փոխըմբռնման յուշագրեր։

Միացեալ մամլոյ ասուլիս

Միացեալ մամլոյ ասուլիսի ընթացքին Փեզեշքեան յայտարարած է, թէ տարածաշրջանին մէջ կառավարումը պէտք է ըլլայ կովկասեան, նկատի ունենալով որ կառավարման արտայանձնումը այլ տէրութիւններու աւելի՛ կը բարդացնէ իրավիճակը։ “Մենք միշտ պաշտպանած ենք Հայաստանի Հանրապետութեան տարածքային ամբողջականութիւնը եւ այդ մեր քաղաքականութիւնն է։ Դէմ ենք որեւէ ուժի կիրարկման”,– ըսած է Իրանի նախագահը։ Ընդգծելով, որ տարածաշրջանի խաղաղութիւնը Իրանի համար ունի ռազմավարական նշանակութիւն, Փեզեշքեան նշած է. “Մենք կ՚աջակցինք Հայաստանի եւ Ազերպայճանի միջեւ խաղաղութեան բանակցութիւններուն”։

Իր կարգին վարչապետ Փաշինեան յայտարարած է. “Երկուստեք համաձայն գտնուեցանք, որ հասունցած է պահը աշխատանք տանելու մեր երկիրներու յարաբերութիւնները բարձրացնելու ռազմավարական գործընկերութեան մակարդակի”։ Ան նշած է, թէ Փեզեշքեանի հետ հանգամանօրէն քննարկուած են տարածաշրջանային խաղաղութեան եւ տնտեսական ենթակառոյցներու ապաշրջափակման առնչուող հարցերը։ Վարչապետը ընդգծած է, թէ Հայաստանի եւ Իրանի միջեւ միջազգային սահմաններու անխախտելիութիւնն ու անխափան հաղորդակցութիւնը ունի կենսական նշանակութիւն։