Մարտ 4-ին, Ֆրանսայի մէջ Հայաստանի դեսպան Արման Խաչատրեան հանդիպում ունեցած է Ֆրանսայի Ներքին գործոց նախարար Պրիւնօ Ռըթայոյի հետ։
Դեսպանը իր զրուցակիցին ներկայացուցած է տարածաշրջանին մէջ խաղաղութեան հասնելու ուղղութեամբ Հայաստանի կառավարութեան ձեռնարկած ջանքերը, «Խաղաղութեան խաչմերուկ» նախագիծը, ինչպէս նաեւ Հայաստանի շուրջ տեղի ունեցող վերջին միջազգային զարգացումները։
Պրիւնօ Ռըթայօ վերահաստատած է Ֆրանսայի կառավարութեան եւ անձնապէս իր յանձնառութիւնը՝ մնայուն կերպով Հայաստանի կողքին կանգնելու եւ անոր աջակցելու ուղղութեամբ։
Հանդիպումին, կողմերը քննարկած են Հայաստանի եւ Ֆրանսայի Ներքին գործոց նախարարութիւններու միջեւ համագործակցութեան զարգացման, Հայաստան-Եւրոպական Միութիւն (ԵՄ) մուտքի արտօնագրերու պարտաւորութեան ջնջումին, ինչպէս նաեւ Հայաստանի մէջ ԵՄ-ի դիտորդական առաքելութեան գործունէութեան առնչուող հարցեր։
Նոյն օրը դեսպան Խաչատրեան հանդիպում ունեցած է նաեւ Իլ-տը-Ֆրանսի Շրջանային խորհուրդի նախագահուհի Վալերի Փեքրէսի հետ։
Կողմերը անդրադարձած են Երեւանի եւ Իլ-տը-Ֆրանս շրջանի միջեւ քաղաքաշինութեան, փոխադրամիջոցներու, աղբահանութեան, ֆրանսախօսութեան բնագաւառներուն մէջ ընթացող արդիւնաւէտ գործակցութեան։
Վալերի Փեքրէս վերահաստատած է իր եւ Իլ-տը-Ֆրանսի Շրջանային խորհուրդի յանձնառութիւնը՝ շարունակելու հայ եւ ֆրանսացի ժողովուրդներու միջեւ բարեկամութեան ամրապնդման եւ Հայաստան-Ֆրանսա գործընկերութեան զարգացման ուղղուած աշխատանքները։
Դեսպանը ներկայացուցած է Հարաւային Կովկասի մէջ մնայուն խաղաղութեան եւ կայունութեան հաստատման ուղղուած Հայաստանի մօտեցումները, անդրադառնալով նաեւ Ազերպայճանի մէջ ապօրինաբար բանտարկուած հայ գերիներու ազատ արձակման հրատապ խնդրին։
Զրուցակիցները անդրադարձած են նաեւ Ազերպայճանի մէջ ապօրինաբար բանտարկուած հայ գերիներու եւ պատանդներու ազատ արձակման խնդրին։
© 2023 Բոլոր իրաւունքները վերապահուած են։
