ՀՀ վարչապետ Նիկոլ Փաշինեանի գլխաւորած պատուիրակութեան կազմին մէջ Փարիզ գտնուող Արտաքին գործոց նախարար Արարատ Միրզոյեանի և Ֆրանսայի Արտաքին գործոց նախարարութեան՝ Զբօսաշրջութեան, արտասահմանի Ֆրանսացիներու եւ ֆրանսախօսութեան պատուիրակ նախարար Ժան-Պաթիսթ Լըմուանի համանախագահութեամբ, Մարտ 9-ին տեղի ունեցած է Հայաստանի և Ֆրանսայի միջև դիւանագիտական յարաբերութիւններու հաստատման 30-ամեակին նուիրուած «Յաւակնութիւններ՝ Ֆրանսա-Հայաստան» խորհրդաժողովը:
ՀՀ ԱԳ նախարար Միրզոյեան անդրադարձած է ֆրանքեւհայկական առանձնաշնորհեալ յարաբերութիւններու զարգացման հեռանկարներուն՝ ընդգծելով, որ երկու ժողովուրդներու միջև ձեւաւորուած հարիւրամեակներու պատմութիւն ունեցող աւանդական կապերը կարեւոր հիմք հանդիսացած են ֆրանքեւհայկական միջպետական յարաբերութիւններու զարգացման համար: Ան շեշտած է, որ հակառակ 30-ամեայ հայ-ֆրանսական հարուստ օրակարգին՝ առկայ են համագործակցութեան ընդլայնման մեծ կարելիութիւններ, մասնաւորապէս՝ տնտեսական, կրթական, առողջապահական, մշակութային և այլ բնագաւառներու մէջ:
Արարողութեան ընթացքին շեշտուած է, թէ առկայ է երկուստեք վճռականութիւն՝ Հայաստանի և Ֆրանսայի միջև յարաբերութիւններու ոգիով ընդլայնելու ֆրանքեւհայկական տնտեսական համագործակցութիւնը՝ զայն պատշաճեցնելով երկու ժողովուրդներու բարեկամութեան ու քաղաքական սերտ երկխօսութեան մակարդակին։
Իբրեւ տնտեսական օրակարգի զարգացման կարևոր փուլ յատկապէս ընդգծուած է անցեալ Դեկտեմբերին Փարիզի մէջ կայացած տնտեսական հարցերու աշխատանքային խումբին համատեղ հանդիպումն ու ֆրանքեւհայկական տնտեսական համագործակցութեան հնգամեայ ճանապարհային քարտէսի ստորագրութիւնը:
Ամփոփելով իր ելոյթը՝ Արարատ Միրզոյեան նշած է, թէ Հայաստանի և Ֆրանսայի միջև յարաբերութիւնները կը թեւակոխեն իրենց 30-ամեակը կարեւոր իրագործումներով, որոնց խորացման ու ամրապնդման համար առկայ է երկկողմ պատրաստակամութիւն և մեծ ներուժ։
