«Լը Մոնտ» Հոկտեմբեր 18-ի իր թիւին մէջ ամբողջ էջ մը (էջ 7) յատկացուցած է ազերպայճանցի զինուորներու գործած ռազմական ոճիրներուն։ 

Եթէ հոն ըսուածները՝ թերթիս ընթերցողներուն համար ոչ մէկ նորութիւն կը պարունակեն, բայց եւ այնպէս լրագրողուհի Ֆոսթին Վենսանի ստորագրութիւնը կրող գրութիւնը արժանիքն ունի ֆրանսացի ընթերցողներու լայն խաւերու ուշադրութեան յանձնելու այդ զազրելի ոճիրները։ 

Յօդուածին մէջ նախ անդրադարձ կը կատարուի ընկերային ցանցերու վրայ վերջերս տարածուած իրերայաջորդ ցնցիչ տեսանիւթերուն, ուր ազերի զինուորները (որոշ աղբիւրներու համաձայն՝ նա՛եւ՝ թուրք զինուորներ – «ՆՅ») տմարդի հպարտութեամբ ցոյց կու տան դիպուկահարուհի Անոյշ Ապետեանին յետմահու եւ գերի ինկած եօթը հայ զինուորներու իրենց բաժին հանած գազանաբարոյ դաժանութիւնները, ճակատագիրը։ Լրագրողուհին կ՚ընդգծէ, թէ ներկայիս այս տեսանիւթերը օրակարգի վրայ ըլլալով հանդերձ, Հայաստանի մարդկային իրաւանց պաշտպանը՝ հայ զինուորներու նուազագոյն իրաւունքները բռնաբարող առնուազն 300 նման տեսանիւթ ցուցակագրած է։ Յօդուածագիրը կը յիշեցնէ, թէ  Հոկտեմբեր 14-ին մարդկային իրաւանց Human Rights Watch միջազգային կազմակերպութիւնը հաստատեց իսկութիւնը վերջին տեսանիւթին, ուր հայ եօթը ռազմագերիներ կը գնդակահարուին Ազերիներու կողմէ։ 

Այնուհետեւ, անդրադարձ կը կատարուի այս անմարդկային ոճիրներուն Պաքուի վարչակարգին վարած հայատեաց քաղաքականութեամբ խրախուսուած ըլլալու հանգամանքին, եզրակացնելու համար որ՝ այսպիսի պայմաններու մէջ ի սկզբանէ ձախողութեան դատապարտուած է նման ոճիրի ոեւէ հեղինակի՝ այդ վարչակարգին կողմէ պատժուած տեսնելու որեւէ յոյս։ Ընդհակառակն։ Օրինակ ալ կը բերուի Ռամիլ Սաֆարովի պարագան։ 

Կը խօսուի նաեւ խաղաղութեան պայմանագիր կնքելու ջանքերուն, Եւրոպական Միութեան քաղաքացիական առաքելութեան այս օրերուն Հայաստան-Ազերպայճան սահմանագիծին տեղադրման մասին եւ այլն։ 

Յօդուածին տակ, ուրիշ կարճ բաժինով մըն ալ վերլուծուած է Կովկասը իրենց ազդեցութեան տակ ներքաշելու՝ Ռուսերու եւ Եւրոպացիներու  պայքարը։