Հայաստանի Ազգային գրադարանի (ՀԱԳ) տնօրէն Աննա Չուլեան օրերս աշխատանքային հանդիպում մը ունեցած է «Calfa» արհեստագիտական կեդրոնի տնօրէն՝ Շահան Վիտալ-Կորէնի եւ Ֆրանսայի Ազգային գրադարանի (BnF — Bibliothèque nationale de France) DataLab-ի համակարգող՝ Մարի Գարլէնի հետ:

Հանդիպման ընթացքին քննարկուած է, թէ ինչպէս Ֆրանսայի Ազգային գրադարանի DataLab-ի փորձառութիւնն ու գործիքակազմը կրնան կիրարկուիլ Հայաստանի Ազգային գրադարանին մէջ, ի մասնաւորի՝ հաշուի առնելով ՀԱԳ-ի թուային պաշարներուն ծաւալն ու նիւթերուն բացառիկ հանգամանքը:

Գլխաւոր նպատակը պիտի ըլլայ օգտագործել այս համագործակցութիւնը՝ թուային մարդասիրական գիտութիւններու հետազօտողներուն աջակցելու համար:

Նախաձեռնութեան քննարկումները կը կատարուին «Ֆրանսա-Հայաստան. պատմական եւ մշակութային երկխօսութիւն» խորագրով միջազգային գիտաժողովի շրջանակին մէջ, ինչպէս նաեւ՝ ՀԱԳ-ի, Ֆրանսայի Ազգային գրադարանի եւ «Calfa» արհեստագիտական կեդրոնին միջեւ կնքուած համագործակցութեան յուշագրերուն համաձայն: