Սթրազպուրկի քաղաքային խորհուրդը Նոյեմբեր 7-ին միաձայնութեամբ ընդունած է Հայաստանին աջակցութիւն ցուցաբերելու վերաբերեալ բանաձեւ մը, զոր ներկայացուցած էր խորհուրդի անդամ Փիէր Ժաքուպովից։
Բանաձեւին մէջ ընդգծուած է, որ Հայաստան իր հողին վրայ կրկին անգամ Ազերպայճանի կողմէ յարձակման ենթարկուած է եւ խախտուած են անոր սահմաններն ու միջազգային իրաւունքը։
Նշուած է, որ Հայաստան, Եւրոպայի խորհուրդի անդամ բարեկամ երկիր է, որու նկատմամբ կրկնուող յարձակումները գոյութենական վտանգ կը ներկայացնեն, եւ այդ անընդունելի է։
Սթրազպուրկի քաղաքային խորհուրդը եւ անոր բոլոր անդամները կը հաստատեն իրենց աջակցութիւնը հայ ժողովուրդին եւ խստօրէն կը դատապարտեն Հայաստանի վրայ ռազմական յարձակումը՝ կոչ ընելով վերադառնալու արդար եւ յարատեւ խաղաղութեան:
Ի նշան՝ Հայաստանի եւ հայ ժողովուրդի հետ համերաշխութեան, նիւթական աջակցութենէն բացի, Սթրազպուրկի քաղաքապետարանի եւ վարչական կեդրոնի շէնքերուն վրայ կը բարձրացուի Հայաստանի դրօշը։
