Արենի-1 քարայրը

Յուլիս 29-ին, Կրթութեան, գիտութեան, մշակոյթի ու մարզանքի (ԿԳՄՄ) նախարարութեան, «Հայաստանի Գինեզբօսաշրջութեան խորհուրդ» հասարակական կազմակերպութեան եւ «Արենի—1 քարայր» գիտահետազօտական հիմնադրամին միջեւ ստորագրուած է համագործակցութեան յուշագիր մը, նպատակ ունենալով մշակելու Վայոց ձորի մարզի «Արենի-1 քարայրը եւ յարակից գինեգործական տարածքը» ԻՒՆԷՍՔՕ-ի համաշխարհային ժառանգութեան նախնական ցանկին մէջ արձանագրելու դիմումը։

Յուշագիրը ստորագրած են ԿԳՄՄ փոխնախարար Ալֆրեդ Քոչարեան, «Հայաստանի Գինեբօսաշրջութեան խորհուրդ»-ի գործադիր տնօրէն Տիգրան Մարտիրոսեան եւ «Արենի-1 քարայր» հիմնադրամի տնօրէնի պաշտօնակատար Բորիս Գասպարեան:

Ալֆրեդ Քոչարեան ընդգծելով եռակողմանի համագործակցութիւնը նշած է, թէ միասնական ջանքերու շնորհիւ տարիներու դադարէ ետք ԻՒՆԷՍՔՕ-ի ժառանգութեան նախնական ցանկին մէջ արդէն արձանագրուած են նոր յուշարձաններ եւ այս աշխատանքը պէտք է ըլլայ շարունակական, որ միեւնոյն ատեն պիտի նպաստէ Հայաստանի զբօսաշրջութեան բնագաւառի զարգացման ուղղութեամբ ձեռնարկուող քայլերուն։