Արցախի Հանրապետութեան Արտաքին գործոց նախարարութիւնը արձագանգելով Ազէրպայճանի նախագահ Ալիեւի յայտարարութիւններուն՝ հրապարակած է հետեւեալ հաղորդագրութիւնը.-
«Մի շարք լրասփիւռներին տուած հարցազրոյցում (տե՛ս. «ՆՅ»–ի Յունուար 15-ի թիւը) Ադրբեջանի Հանրապետութեան նախագահ Իլհամ Ալիևը, անդրադառնալով ադրբեջանա-ղարաբաղեան հակամարտութեան կարգաւորմանը և տարածաշրջանային գործընթացներին, կրկին օգտագործել է հայատեաց, ապակառուցողական, ծաւալապաշտական բառապաշար և գաղափարներ՝ հնչեցնելով դրանց համապատասխանող ծրագրեր ու նպատակներ։
Նման քաղաքականութիւն միջազգային մարդասիրական իրաւունքի և ձեռք բերուած համաձայնութիւնների կոպիտ խախտում է։ Ադրբեջանի ղեկավարը յատուկ թիրախաւորել է նաև ԵԱՀԿ Մինսկի խմբի համանախագահութեան և համանախագահող երկրներից մէկի՝ Ռուսաստանի Դաշնութեան կողմից Արցախում իրականացուող խաղաղապահ առաքելութեանը՝ անհեթեթ մեղադրանքներ հնչեցնելով նրանց գործունէութեան դէմ։
ԵԱՀԿ Մինսկի խմբի համանախագահութեան ձևաչափը հանդիսանում է ադրբեջանա-ղարաբաղեան հակամարտութեան կարգաւորման բոլոր կողմերի միջև համաձայնեցուած միակ ձևաչափը։
Մենք բարձր ենք գնահատում ռուս խաղաղապահ զօրակազմի առաքելութիւնն Արցախում և անընդունելի համարում նրանց գործունէութեան վրայ ստուեր գցելու որեւէ փորձ։
Արցախի Հանրապետութեան ԱԳՆ-ն խստիւ դատապարտում է Ադրբեջանի կեցուածքը՝ համոզուած լինելով, որ պետական մակարդակով իրականացուող այսպիսի քաղաքականութիւնը պէտք է արժանանայ համապատասխան գնահատականի նաև միջազգային հանրութեան կողմից»։
