Արցախի Հանրապետութեան նախագահ Արայիկ Յարութիւնեան Մարտ 12-ին ընդունած է ՀՅԴ-ի նորընտիր Բիւրոյի անդամ Դաւիթ Իշխանեանը և Արցախի Կեդրոնական կոմիտէի ներկայացուցիչ Արթուր Մոսիեանը:
ԱՀ նախագահի լրատու վարչութենէն հաղորդած են, թէ Յարութիւնեան բարձր գնահատած է համահայկական խնդիրներու լուծման գործին մէջ ՀՅԴ-ի ունեցած դերակատարութիւնը եւ աշխարհասփիւռ կառոյցին ջանքերը: Նախագահը յատկապէս ընդգծած է Հայ դատի գրասենեակներուն հետ համագործակցութեան կարեւորութիւնը՝ նշելով, թէ արդիւնաւէտ հանդիպում ունեցած է Հայ դատի Եւրոպայի գրասենեակի պատասխանատու Գասպար Կարապետեանի հետ:
Զրուցակիցները քննարկած են Հանրապետութեան ներքին ու արտաքին քաղաքականութեան, առկայ մարտահրաւէրներուն, ինչպէս նաև տարածաշրջանի ու աշխարհի իրադարձութիւններուն վերաբերող հարցեր։
