Յուլիս 22-ի առաւօտեան, Երուսաղէմի մէջ կայացած միատեղ մամլոյ ասուլիսին՝ Երուսաղէմի Յոյն պատրիարք՝ Թէոֆիլոս Գ. եւ Երուսաղէմի Լատին պատրիարք՝ Փիերպաթիսթա արքեպիսկոպոս Փիցապալա Կազա իրենց կատարած հովուական եւ մարդասիրական այցելութեան մասին ներկաներուն հաղորդած են տեղւոյն ժողովուրդին կրած անասելի տառապանքները, ռմբակոծութիւնները, պաշարումն ու զրկանքները։

Մամլոյ ասուլիսին Երուսաղէմի հայոց պատրիարքութենէն ներկայ եղած են Թէոդորոս եպիսկոպոս Զաքարեան, ընկերակցութեամբ՝ դիւանապետ Աղան վարդապետ Գոգչեանի։

Իր խօսքին մէջ Թէոֆիլոս Գ. պատրիարք Կազան նկարագրած է որպէս «պատերազմի վէրքերով խոցուած երկիր, ուր անմեղներուն արիւնը կը հոսի անողոք յարձակման ծանրութեան տակ»։

Պատրիարքը խօսած է աւերուած եկեղեցիներու, մասնաւորապէս Սուրբ Ընտանիքի եկեղեցւոյ եւ Սուրբ Պորփիւրիոսի վանքի զգայացունց պատկերին մասին, ուր աղօթք բարձրացուցած են վիրաւորներու ճիչերուն հետ համատեղ։ Ան ընդգծած է, թէ Եկեղեցւոյ ներկայութիւնը խորհրդանշական չէ, այլ Աւետարանի թելադրութեան կենդանի դրսեւորում՝ կանգնիլ նեղեալներու կողքին ոչ թէ խօսքով, այլ գործով։

Ասուլիսի աւարտին զոյգ պատրիարքները ընգծած են, որ Կազայի մէջ շարունակուող աւերածութիւնները մարդասիրական եւ բարոյական աղէտ են, զոր կարելի չէ անտեսել եւ հաստատած են, թէ Եկեղեցին կը շարունակէ մնալ որպէս ճշմարտութեան կենդանի ձայն՝ կրելով յոյսի խաչը անարդարութեան առջեւ եւ պաշտպանելով մարդկային արժանապատւութիւնը կեանքի իրաւունքը պղծող քաղաքականութեան դէմ։

Լուսանկարները՝ © lpj.org-ի