Թուրքիոյ մեճլիսի (խորհրդարանի) նախկին փոխնախագահ Հասան Քորքմազճան յայտնած է, թէ Թուրքիա ո՛ր պարագային պէտք է կարգաւորէ Հայաստանի հետ յարաբերութիւնները։

Թրքական Aydinlik–ի համաձայն՝ Քորքմազճան, որ ներկայիս Թալէաթ փաշա միութեան նախագահն է, շեշտած է, որ Թուրքիա պէտք է Հայաստանի հետ յարաբերութիւնները կարգաւորէ մի՛այն Հայաստանի կողմէ հետեւեալ չորս նախապայմաններու իրագործումէն ետք։

1. Անմիջապէս գործադրել 2020 Նոյեմբեր 9–ին ձեռք բերուած եռակողմ համաձայնութիւնները։

2. Հայաստան պէտք է յարգէ Թուրքիոյ տարածքային ամբողջականութիւնը եւ յայտարարէ այդ մասին։

3. Հայաստան պէտք է հրաժարի «ցեղասպանութեան պնդումներէն», քանի որ ՄԻԵԱ-ի մէջ Փերինչեք-Զուիցերիա դատական գործընթացին արդէն շեշտուած է, որ անոնք անհիմն են։

4. Պէտք է վերջ տայ Թուրքիոյ դէմ թշանամանքին, եւ  վար իջեցնէ Շիրակի մարզին մէջ զետեղուած եւ թուրք ազգը նուաստացնող արձանը (իմա՝ Սողոմոն Թեհլերեանի արձանը – «ՆՅ»)։