«Իլուր»-ի հարցումին, թէ ինչպէ՞ս կը գնահատէ Մեղրիի վերաբերեալ ամերիկեան միջնորդութեամբ կնքուած հայ-ազերպայճանական հռչակագիրը, Հայաստանի առաջին նախագահ Լեւոն Տէր-Պետրոսեան սապէս պատասխանած է.

«Իշխանութիւնները, բնականաբար, դա ցնծութեամբ համարում են իրենց մեծագոյն յաջողութիւններից մէկը։ Իսկ խորհրդարանական ընդդիմութիւնը, նոյնքան բնականաբար, համաձայնագրում ոչ միայն որեւէ դրական բան չի տեսնում, այլեւ, ընդհակառակը, գուժում է նրա կիրառման կործանարար հետեւանքները։ 

Ինչ վերաբերում է ինձ ուղղած ձեր հարցումին, ապա ես առայժմ զերծ կը մնամ պատասխանելուց, քանի որ համոզուած եմ` դրան հնարաւոր է անդրադառնալ միայն համաձայնագրի գործադրումից յետոյ։ Ինձ մօտ առայժմ որոշ տարակուսանք են առաջացնում բարեկամական Իրանի պաշտօնեաների տարաբնոյթ (թէեւ, գուցէ, միմեանց լրացնող) գնահատականները եւ, մանաւանդ, Ռուսաստանի գրեթէ բացարձակ լռութիւնը։ Իրանական դիւանագիտութիւնը այնքան նուրբ է, որ երբեմն դժուար է անմիջապէս այն ընկալել։ Իմ փորձառութիւնից, սակայն, կարող եմ հաւաստել, որ մեր երկրի անկախութեան վերականգնումից ի վեր Իրանը Հայաստանի նկատմամբ ոչ միայն որեւէ դժգոհութիւն կամ կշտամբանք չի արտայայտել, այլեւ դրականօրէն է արձագանգել մեր բոլոր կարիքներին։ Մի խօսքով, Հայաստանի եւ Իրանի աւելի քան 30-ամեայ յարաբերութիւններում ես որեւէ թիւրըմբռնում չեմ տեսել»։