ՀՀ Գլխաւոր դատախազութիւնը հրապարակած է յայտարարութիւն մը շարունակուող հաւաքներու ընթացքին՝ սահմանուած իրաւական կարգաւորումներու շրջանակին մէջ մնալու անհրաժեշտութեան մասին։ Յայտարարութեան մէջ շեշտուած է, որ հաւաքներու ընթացքին արտասանուած ճառերուն մէջ կտրուկ աճած է անհանդուրժողականութեան եւ ատելութեան խօսքը։
Յայտարարութեան մէջ կ՚ըսուի.-
«Մայրաքաղաք Երեւանում եւ առանձին վայրերում շարունակւում են անցկացուել բողոքի ակցիաներ եւ հաւաքներ, որոնց ֆոնին ինչպէս հաւաքների առանձին մասնակիցների, այնպէս էլ այլոց կողմից հանրային խօսքում կտրուկ աւելացել է նաեւ այլախոհութեան նկատմամբ անհանդուրժողականութեան եւ ատելութեան խօսքը, արձանագրուել են բռնութեան կիրառման կամ բռնութիւնն արդարացնող կոչեր պարունակող յայտարարութիւններ անելու դէպքեր, որոնք ինքնին հանդիսանում են յանցածին երեւոյթներ եւ զգալիօրէն մեծացնում են նոր յանցագործութիւնների կատարման հնարաւորութիւնը։
Հաշուի առնելով վերոգրեալ իրողութիւնները՝ ՀՀ Գլխաւոր դատախազութիւնը հարկ է համարում զգուշացնելու հետեւեալը։
Հայաստանի Հանրապետութիւնում օրէնքով սահմանուած կարգով խաղաղ հաւաքների անցկացումը, դրանց քաղաքացիների ազատ մասնակցութիւնը երաշխաւորուած է։ Իրաւապահ մարմիններն ապահովում եւ շարունակելու են ապահովել հաւաքների խաղաղ ընթացքը եւ մասնակիցների անվտանգութիւնը։
Միեւնոյն ժամանակ, հաւաքների, երթերի անցկացումը որեւէ կերպ չեն կարող տեղի ունենալ այլոց իրաւունքների, օրինական շահերի ոտնահարմամբ եւ արհամարհմամբ, խաթարել հանրային կենսագործունէութեան բնականոն ընթացքը։
ՀՀ Գլխաւոր դատախազութիւնը ինչպէս հաւաքների փաստացի նախաձեռնողներին եւ ղեկավարողներին, այնպէս էլ մասնակիցներին խստօրէն զգուշացնում է զանգուածային միջոցառումների ձեռնարկման եւ անցկացման ընթացքում մնալ “Հաւաքների ազատութեան մասին” ՀՀ օրէքով սահմանուած իրաւակարգաւորումների շրջանակներում, դրսեւորել իրաւահպատակ վարքագիծ, ձեռնպահ մնալ Հայաստանի Հանրապետութեան ներքին անվտանգութեանը սպառնացող որեւէ գործողութիւն կատարելուց, այդ թւում՝ հաւաքների մասնակիցների անվտանգութիւնն ապահովող եւ իրենց ծառայողական պարտքը կատարող իրաւապահների, ինչպէս նաեւ քաղաքացիների հետ հնարաւոր բախումներ, սադրիչ գործողութիւններ, զանգուածային անկարգութիւններ հրահրելուց կամ դրանց մասնակիցը դառնալուց։
Իրաւակարգի յանցաւոր խաթարման փորձեր կատարողներն անվերապահօրէն ենթարկուելու են համարժէք իրաւական պատասխանատււութեան»։
