Արեւմտեան Եւրոպայի Հայրապետական պատուիրակ եւ Վատիկանի մէջ Հայց. առաքելական եկեղեցւոյ ներկայացուցիչ՝ Խաժակ արք. Պարսամեան, հրաւիրուած էր Լիզպոն, մասնակցելու հայազգի նշանաւոր գործարար եւ բարերար Գալուստ Կիւլպէնկեանի մահուան 70-ամեակի յիշատակին նուիրուած աւանդական ձեռնարկներուն։

Այդ առթիւ՝ Յուլիս 18-ի առաւօտեան, Սրբազան հայրը այցելած է Գալուստ Կիւլպէնկեան հիմնարկութիւն, ուր հանդիպում ունեցած է Հիմնարկութեան նախագահ Անթոնիօ Ֆեյժոյի եւ Հիմնարկութեան Հայկական բաժինի տնօրէն դոկտ. Ռազմիկ Փանոսեանի հետ։

Նոյն օրը՝ São Sebastião da Pedreira եկեղեցւոյ մէջ տեղի ունեցած է կաթոլիկ եկեղեցական արարողութիւն՝ Գալուստ Սարգիսի Կիւլպէնկեանի հոգիի խաղաղութեան համար, որու ընթացքին Խաժակ սրբազան «Հոգւոցն հանգուցելոց» աղօթք կատարած եւ իր ուղերձը յղած է։ Սրբազանը սկսած է ուղերձը դրուատանքի խօսքերով՝ ուղղուած Գալուստ Կիւլպէնկեանին՝ «մարդուն, որ ունէր տեսլական եւ առատաձեռն սիրտ եւ որու գործը կը շարունակէ ներշնչել մեր սրտերն ու հասարակութիւնը։ Ան խորապէս կը հաւատար մշակոյթի, կրթութեան եւ հասարակական պատասխանատւութեան ուժին»։

Սրբազան հայրը իր խօսքով անդրադարձած է Աւետարանի՝ ժայռի վրայ կառուցուած տան առակին (Մատթ. 7:24–27), զայն ներկայացուցած որպէս պատկերաւոր համեմատութիւն Հիմնարկութեան գործունէութեան հետ, որ մինչ օրս կը կառուցուի իր հիմնադիրի սկզբունքներու հիման վրայ․ «Այն ժայռը, որու վրայ կը շարունակէք կառուցել՝ Գալուստ Կիւլպէնկեանի ժառանգութիւնն է՝ նուիրուածութիւն մշակոյթին, կրթութեան, նորարարութեան եւ մարդու արժանապատւութեան նկատմամբ յարգանքին։ Այս արժէքները անցողիկ չեն, ատոնք յաւերժ ճշմարտութիւններ են, որոնք կ՚առաջնորդեն ձեր առաքելութիւնը»։

Խաժակ սրբազան գովեստով խօսած է Հիմնարկութեան գործունէութեան մասին՝ նշելով, որ ան նախագահ Ֆեյժոյի առաջնորդութեամբ կրցած է նորարարութիւն ներմուծել Հիմնարկութեան արժէքներուն հաւատարիմ մնալով հանդերձ։ Ան ընդգծած է, որ իւրաքանչիւր նախաձեռնութիւն պէտք է գնահատել այն հարցումին լոյսին ներքոյ, թէ՝ «արդեօք այս կամ այն որոշումը կ՚արտայայտէ՞ այն տեսլականն ու յոյսը, զորս Կիւլպէնկեան ձգած է մեզի՝ որպէս մարդկային յառաջընթացի պատգամ»։

Ելոյթի կարեւոր պահերէն եղած է ապագայ սերունդներու նկատմամբ պատասխանատւութեան շեշտադրումը․ «Ձեր ծրագրերէն օգտուող երիտասարդները պէտք է կարենան այդ միջոցառումներուն զգալ Կիւլպէնկեանի արժէքներու կենդանի շունչը։ Այդ կերպ հիմնադիրի պատգամը եւ ձգած ժառանգութիւնը պէտք է գոյատեւեն ժամանակին ընդառաջ»։

Արարողութիւնը աւարտած է հանդիսաւոր աղօթքով՝ Գալուստ Կիւլպէնկեանի հոգիի խաղաղութեան համար։ Սրբազանի եզրափակիչ խօսքը եղած է կոչ մը՝ շարունակելու հիմնադիրի նախանշած ուղին՝ յոյսով, հաստատակամութեամբ եւ նուիրուածութեամբ։

Երեկոյեան Սրբազանը մասնակցած է Հիմնարկութեան նուագախումբի տօնական համերգին։

Յաջորդ օրը Խաժակ սրբազան մկրտած է տեղւոյն հայ համայնքի երկու չափահաս անդամները։

Իսկ Կիրակի, Յուլիս 20-ին, քաղաքի եւ շրջակայ վայրերու հայ հաւատացեալները մեծ գոհունակութեամբ մասնակցած են São Sebastião da Pedreira եկեղեցւոյ մէջ Սրբազան հօր  ձեռամբ մատուցուած պատարագին՝ նուիրուած Պայծառակերպութեան (Վարդավառի) տօնին, որ Հայ եկեղեցւոյ տօնացոյցով կը նշուի Յուլիս 27-ին։ Սրբազան հօր սպասարկած է Սպանիոյ եւ Փորթուկալի հոգեւոր հովիւ Թորոս քահանայ Եսայեան։

Պատարագէն ետք, համայնքի անդամները, Սրբազանի սեղանապետութեան ներքոյ համախմբուած են եկեղեցւոյ բակը կազմակերպուած տօնական սեղանին շուրջ,  մտերմիկ ու բարեկամական մթնոլորտի մէջ։