Ապրիլ 22-ին, Մարսիլիոյ Ֆառօ պալատը Հայաստանի գոյներով լուսաւորուեցաւ, ինչ որ պարզ խորհրդանշական նախաձեռնութիւն մը չէր, այլ տեղւոյն քաղաքացիներու յարգանքի տուրքը՝ Հայոց ցեղասպանութեան նահատակներու յիշատակին։

Քաղաքապետ Պընուա Փայանի ներկայութեան՝ Հայաստանի աւագ հիւպատոս Արա Մկրտչեան իր կուռ ելոյթի ընթացքին վերակենդանացուց մեր նախնիներուն անջնջելի յիշատակը, որոնք կը կրէին ուժ մը, որ ո՛չ ժամանակը, ո՛չ ալ մոռացութեան մատնելու ճիգերը կրցած են մարել։ Ան յիշեցուց թէ ինչպէս Ա. Համաշխարհային պատերազմի քօղին տակ, Օսմանեան կայսրութիւնը ծրագրեց 1,5 միլիոն հայերու բնաջնջումը, ոճիր մը, որ Պատմութիւնը ո՛չ կրնայ մաշեցնել, ո՛չ ալ լռեցնել։

“Այս յիշատակումը սահմանափակուած չէ յիշողութեամբ. ան ճիչ մըն է, զգօնութեան խոստում մը, հանդիսաւոր կոչ մը ցեղասպանութեան ոճիրներուն դէմ, նորոգուած յանձնառութիւն մը՝ ճշմարտութիւնը ապրեցնելու լռութեան եւ ժխտողականութեան դէմ”,– նշեց Հայաստանի աւագ հիւպատոսը։