Օգոստոս 7-ին, աշխատանքային այցով ԱՄՆ գտնուող վարչապետ Նիկոլ Փաշինեան այցելած է Ուաշինկթընի Աստուածաշունչի թանգարան:

Վարչապետը թանգարանի ընդհանուր տնօրէն Աարոն Ռոսի ուղեկցութեամբ շրջած է թանգարանին մէջ, ծանօթացած ներկայացուած ցումանմուշներուն: Սոյն թանգարանին մէջ կը պահուին նաեւ հայկական քրիստոնէական ժառանգութեան ցուցանմուշներ եւ հայկական հնագոյն Աստուածաշունչը:

Վարչապետը թանգարանին նուիրած է Գրիգոր Նարեկացիի միջնադարեան նկարազարդ մատեանի կրկնօրինակը, որ Նարեկացիի «Մատեան ողբերգութեան» աղօթագիրքի ամէնէն հին օրինակներէն է։ Բնագիրը գրուած է 1173-ին Կիլիկիոյ մէջ՝ նշանաւոր գրչագիր եւ նկարիչ Գրիգոր Սկեւռացիի ձեռամբ՝ պատուէրով հայ մատենագիր, աստուածաբան Ներսէս Լամբրոնացիի։ Ձեռագիրը կը պահպանուի Մատենադարանին մէջ՝ որպէս հայ գրաւոր եւ մանրանկարչական արուեստի բացառիկ գլուխ-գործոցներէն մէկը։