Վարչապետ Նիկոլ Փաշինեան Հոկտեմբեր 15-ին  Կառավարութեան մէջ հիւրընկալած է աշխատանքային այցելութեամբ Հայաստան գտնուող Պելճիքայի թագուհի Մաթիլտը։

Վարչապետը ողջունած է թագուհիին այցելութիւնը Հայաստան եւ յոյս յայտնեց, որ ան մեր երկրէն ջերմ տպաւորութիւններ պիտի ստանայ։ Փաշինեան ընդգծած է հիւրին առաջնորդ  դերը՝ որպէս ՄԱԿ—ի Կայուն Զարգացման Նպատակներու ջատագով եւ աւելցուցած, որ Հայաստան հետեւողական քայլեր կ՚առնէ «2030 Օրակարգ»-ի* շրջանակին մէջ ստանձնած պարտաւորութիւնները լաւագոյնս կեանքի կոչելու համար։

Մաթիլտ թագուհի շնորհակալութիւն յայտնած է ջերմ հիւրընկալութեան համար եւ նշած, որ տպաւորուած է Հայաստանէն։ Ան կարեւոր գնահատած է ՄԱԿ—ի Կայուն Զարգացման Նպատակներու պաշտպանութիւնը եւ այդ ուղղութեամբ միջոցառումներու իրականացումը։ Այս համածիրին մէջ, երկու կողմերն ալ շեշտը դրին ներառական եւ որակեալ կրթութեան կարեւորութեան վրայ՝ Կայուն Զարգացման Նպատակներուն հասնելու համար։

Անդրադարձ կատարուաւծ է նաեւ հասարակութեան մէջ կիներու դերին հզօրացման հարցին եւ այդ ուղղութեամբ իրականացուող քայլերուն։

Մտքեր փոխանակուած են նաեւ Հայաստանի եւ Ազերպայճանի միջեւ խաղաղութեան հաստատման եւ տարածաշրջանին մէջ կայունութեան ապահովման ուղղուած ջանքերուն շուրջ։

___

(*) «2030 Օրակարգը» ՄԱԿ—ի կողմէ 2015-ին ընդունուած՝ գործողութիւններու համապարփակ ծրագիր է, որու պաշտօնական անուանումն է՝ «Փոխակերպենք մեր աշխարհը. կայուն զարգացման օրակարգ մինչեւ 2030 թուականը»։