Ցուցա­հան­դէսներ, հա­մերգներ, շար­ժանկա­րի ցու­ցադրու­թիւններ, դա­սա­խօ­սու­թիւններ եւ կլոր սե­ղան­ներ… Արե­ւելեան լե­զու­նե­րու եւ քա­ղաքակրթու­թիւն­նե­րու ազ­գա­յին հիմ­նարկին (ԻՆԱԼ­ՔՕ) 2021-ի տա­րեվեր­ջը պի­տի յատ­կանշուի «Անդրկով­կասներ 20/21» փա­ռատօ­նով: Այսպէս, Հոկ­տեմբեր 4-էն մին­չեւ Դեկ­տեմբեր 10, ԻՆԱԼ­ՔՕ-ի եր­կու տար­բեր վայ­րե­րուն մէջ տե­ղի պի­տի ու­նե­նան մշա­կու­թա­յին եւ գի­տական շարք մը ձեռ­նարկներ նուիրուած՝ Կով­կա­սին, այնպէս ինչպէս այս տա­րածաշրջա­նը ապ­րած, ըն­կա­լած, ու­սումնա­սիրած, երե­ւակա­յած, պատ­մած են արուես­տա­գէտ­նե­րը, հե­տազօ­տող­նե­րը, ճա­նապար­հորդնե­րը եւ տեղ­ւոյն վրայ գոր­ծողնե­րը:

Առա­ջին ան­գամ 2014-ին նա­խաձեռ­նուած այս փա­ռատօ­նը ամ­բողջո­վին կը պատ­շա­ճի ԻՆԱԼ­ՔՕ-ի առա­քելու­թեան եւ ոգիին, քա­նի որ այս Հիմ­նարկին ստեղ­ծումէն ի վեր կով­կա­սեան լե­զու­ներն ու քա­ղաքակրթու­թիւննե­րը միշտ ալ մե­ծարուած են: Փա­ռատօ­նին հիմ­նա­կան նպա­տակ­ներն են տա­րածաշրջա­նի գե­ղարուես­տա­կան եւ մշա­կու­թա­յին տար­բեր ոլորտնե­րը ներ­կա­յաց­նել, նաեւ անոնց ընդմէ­ջէն առիթ ստեղ­ծել ի մի բե­րելու հան­րութեան տար­բեր շեր­տեր՝ ու­սա­նող­ներ, հե­տազօ­տող­ներ, ու­սուցիչ­ներ, արուես­տա­գէտ­ներ, տեղ­ւոյն վրայ գոր­ծողներ եւ սի­րող­ներ:

Փա­ռատօ­նի ամե­նակա­րեւոր իրա­դար­ձութիւննե­րէն մէկը պի­տի ըլ­լայ ծա­նօթ գոնթրը­պասիստ Գլօտ Չա­միչեանի եւ անոր ճազ եր­րեակին` «Նա­յիրի»-ի ելոյ­թը: Պի­տի ցու­ցադրուի Անն Գոն­սի­նեիի «Ցաւդ տա­նիմ» վա­ւերագ­րա­կան ժա­պաւէ­նը (2019). սրտա­յոյզ ֆիլմ մը՝ մօր մը եւ իր աղջկան՝ հի­ւան­դութեան դէմ պայ­քա­րին եւ ծնունդ առ­նող անսպա­սելի բա­րեկա­մու­թեան մը մա­սին, զոր ան նկա­րահա­նած է Փա­րիզի եւ Երե­ւանի մի­ջեւ: Յար­գանքի տուրք պի­տի մա­տու­ցուի ան­ցեալ տա­րի մա­հացած շար­ժանկա­րի բե­մադիր Լի­լիան տը Քեր­մա­տեքին՝ անոր որոշ ֆիլ­մե­րու ցու­ցադրու­թեան մի­ջոցով, ինչպէս՝ « Très chère Indépendence » եւ « Les enfants de Chouchi » ժա­պաւէն­նե­րը, որոնք ակնդի­րը երե­ւակա­յակա­նին եւ վա­ւերագ­րա­կանին մի­ջեւ կը խո­րասու­զեն ան­կա­խու­թեան պա­տերազ­մի վա­ղոր­դայնի Ար­ցա­խին մէջ: Իսկ Ար­ցա­խի դի­մագ­րա­ւած մար­տահրա­ւէր­նե­րը պի­տի քննար­կուին Նո­րա Մար­տի­րոսեանի՝ Գան­նի 2020-ի փա­ռատօ­նի մաս­նա­կից առա­ջին եր­կար ժա­պաւէ­նին՝ «Եր­բոր քա­մին հան­դարտի»-ի ցու­ցադրու­թեան առ­թիւ։ Մա­րի Կիւլպիանիի գրա­ւիչ վա­ւերագ­րա­կանը թոյլ պի­տի տայ յայտնա­բերել Վրաս­տա­նի կղզիացած մէկ հո­վիտը՝ Փան­քի­սին, որ «մրցա­նիշա­կիր» է Ճի­հատի հա­մար իր հո­ղերէն դէ­պի Սու­րիա եւ Իրաք մեկ­նածնե­րու թի­ւով։ Իսկ Ռա­թի Օնե­լիի՝ բազ­մա­թիւ մրցա­նակ­նե­րու ար­ժա­նացած վա­ւերագ­րա­կանը պա­տու­մը պի­տի կա­տարէ վրա­ցական լքեալ փոք­րիկ քա­ղաքի մը, որ ան­ցեալին ծա­նօթ էր հան­քա­յին ար­դիւնա­բերու­թեամբ եւ որու բնա­կիչ­նե­րը այ­սօր կեան­քի վեհ փի­լիսո­փայու­թեամբ կ՚ապ­րին, փոր­ձե­լով յար­մա­րիլ իրենց յայտնուած դժնդակ կա­ցու­թեան։ Վեր­ջա­պէս, Լե­ւան Աքի­նի «Եւ յե­տոյ պի­տի պա­րենք» ֆիլ­մը, որու գլխա­ւոր հե­րոսն է Վրաս­տա­նի ազ­գա­յին հա­մոյ­թը եւ որ կը պատ­մէ մար­միննե­րու պայ­քա­րին մա­սին, որոնք կը պա­րեն, կը տա­ռապին եւ զի­րար կը ցան­կան աւան­դութիւննե­րով կեր­տուած աշ­խարհի մը մէջ:

Փա­ռատօ­նը կ՚առա­ջար­կէ նաեւ կլոր սե­ղան­ներ: Օր մը պի­տի յատ­կա­ցուի Կով­կա­սի մէջ սե­ռային կողմնո­րոշ­ման հար­ցե­րու, որոնք պի­տի քննար­կուին հե­տազօ­տող­նե­րու, արուես­տա­գէտ­նե­րու, գոր­ծիչնե­րու մաս­նակցու­թեամբ։ Հոկ­տեմբեր, Նո­յեմ­բեր եւ Դեկ­տեմբեր ամիս­նե­րուն նա­խատե­սուած են բազ­մա­թիւ հան­դի­պումներ, հե­ղինակ­նե­րու եւ ստեղ­ծա­գոր­ծութիւննե­րու ներ­կա­յացումնե­րով, հա­սարա­կաց բնա­բան ու­նե­նալով Կով­կա­սը:

Եւ վեր­ջա­պէս, ազ­գագրա­կան որո­նու­մի եւ գե­ղարուես­տա­կան ար­տա­յայ­տութեան խաչ­մե­րու­կին՝ ամե­րիկա­հայ նկա­րիչ եւ հե­տազօ­տող Հեյ­զել Ան­թա­րամեան Հոֆ­մա­նի ցու­ցա­հան­դէ­սը լոյս պի­տի սփռէ սփիւռքի այն Հա­յերու ոդի­սակա­նին վրայ, որոնք Բ. հա­մաշ­խարհա­յին պա­տերազ­մէն յե­տոյ լքե­ցին Ֆրան­սան, Եգիպ­տո­սը, Լի­բանա­նը, Իրա­նը, Իրա­քը, Սու­րիան, Յու­նաստա­նը, Պա­ղես­տի­նը կամ Միացեալ Նա­հանգնե­րը՝ «վե­րադառ­նա­լու» հա­մար իրենց ան­ծա­նօթ Խորհրդա­յին Հա­յաս­տան, որ կոր­սուած հայ­րե­նիքի պատ­կե­րը կը ներշնչէր:

* * *

ԻՆԱԼ­ՔՕ-ի դա­սախօս եւ փա­ռատօ­նի նա­խաձեռ­նող Թա­լին Տէր-Մի­նաս­եան ձեռ­նարկնե­րու այս շար­քին հա­մար կոչ ըրած է եր­կու այլ գոր­ծընկե­րու­հի­ներու՝ Նան­թէ­րի հա­մալ­սա­րանի դա­սախօս Անոյշ Տէր-Սար­գի­սեանին, ինչպէս նաեւ ԻՆԱԼ­ՔՕ-ի դա­սախօս, Կով­կա­սի մաս­նա­գէտ Սո­ֆի Հոհ­մա­նին:

Օգ­տա­կար տե­ղեկու­թիւններ.
— Փա­ռատօ­նի ամ­բողջա­կան յայ­տագրին ծա­նօթա­նալու հա­մար այ­ցե­լել՝
http://www.inalco.fr/actualite/festival-transcaucases- Կազ­մա­կեր­պիչնե­րուն հետ կապ հաս­տա­տելու համար՝
transcaucases@gmail.com
— Մուտքը անվճար է, առողջութեան վկայականի ներկայացումը՝ պարտադիր:
— Փառատօնը պիտի ընթանայ ԻՆԱԼՔՕ-ի երկու վայրերուն մէջ.-
— Maison de la recherche : 2 rue de Lille, 75007 Paris.
— Pôle des langues et civilisations : 65 rue des grands moulins, 75013 Paris. ■