«Հարաւային Կովկասի կայունութեան համար անհրաժեշտ է Լեռնային Ղարաբաղի հակամարտութեան խաղաղ կարգաւորումը»
Իլ-տը-Ֆրանսի Շրջանային խորհուրդի նախագահուհի Վալերի Փեքրես Դեկտեմբեր 5-ին Փարիզի մէջ հանդիպում ունեցած է Արցախի Հանրապետութեան նախագահ Արայիկ Յարութիւնեանի հետ, որ պատուիրակութեան մը գլխաւորութեամբ Ֆրանսա ժամանած է։ Պատուիրակութեան մաս կը կազմէ նաեւ Արտաքին գործոց նախարարի պաշտօնակատար Դաւիթ Բաբայեան։
Տիկին Փեքրես այս առթիւ Թուիթըրի իր հաշիւին գրած է, թէ Արցախի նախագահ Արայիկ Յարութիւնեանի հետ հանդիպումին իր զօրակցութիւնն ու աջակցութիւնը յայտնած է Հայաստանի եւ Լեռնային Ղարաբաղի Հայերուն:
«Դեկտեմբեր 5-ին հանդիպում ունեցայ Արցախի նախագահին հետ: Ես վերահաստատեցի իմ զօրակցութիւնն ու աջակցութիւնը Հայաստանի եւ Լեռնային Ղարաբաղի Հայերուն: Հարաւային Կովկասի կայունութեան եւ խաղաղութեան համար անհրաժեշտ է Լեռնային Ղարաբաղի հակամարտութեան խաղաղ կարգաւորումը»,– գրած է Փեքրես՝ հրապարակելով նաեւ լուսանկարներ Արցախէն Ֆրանսա ժամանած պատուիրակութեան հետ հանդիպումէն:
Նշենք, թէ քանի մը շաբաթ առաջ Իլ-տը-Ֆրանսի Շրջանային խորհուրդը միաձայնութեամբ ընդունած բանաձեւով կը դատապարտէր ազերպայճանական յարձակումը Հայաստանի վրայ եւ կը հաստատէր 2020-ին իր քուէարկած մաղթանքը՝ Ֆրանսայի կողմէ Արցախի Հանրապետութեան ճանաչումը։
Արայիկ Յարութիւնեան ներկայացուցած է Արցախի մէջ տիրող իրավիճակը, ազերպայճանական զինուորականներու ամէնօրեայ գրգռութիւնները, որոնցմէ վերջինը՝ Դեկտեմբեր 3-ին խումբ մը զինեալներու կողմէ քանի մը ժամ փակումն էր Գորիս-Ստեփանակերտ մայրուղիին, որ Արցախը Հայաստանին կապող միակ ճամբան է։ Ան ընդգծած է Արցախցիներուն սպառնացող նոր ցեղասպանութեան մը վտանգը։
Վալերի Փեքրեսի հետ հանդիպումին ներկայ եղած են դեսպանուհի Յասմիկ Տոլմաջեան, Արցախի ներկայացուցիչ Յովհաննէս Գէորգեան, Շրջանային խորհուրդի փոխնախագահ Փաթրիք Քարամ եւ CCAF-ի համանախագահներ Արա Թորանեան եւ Մուրատ Փափազեան։
Յիշեցնենք, որ նախագահ Յարութիւնեան մինչեւ Դեկտեմբեր 9 կը մնայ Ֆրանսա ու հանդիպումներ կ՚ունենայ հայ համայնքին եւ ֆրանսական քաղաքական անձնաւորութիւններու հետ։
