«Ղարաբաղի մէջ իրական ցեղային մաքրագործումներ իրականացուցած երկիրը կը խօսի ժողովրդավարութեան մասին…»
Ֆրանսայի կառավարութիւնը քննադատած է Ազերպայճանի ապակայունացնող քաղաքականութիւնը՝ ֆրանսական Նոր Գալետոնիա անդրծովեան տարածքին նկատմամբ։ Le Figaro-ի համաձայն՝ այս մասին յայտարարած է Անդրծովեան տարածքներու նախարար Մանիւէլ Վալս՝ Նոր Գալետոնիա կատարած այցելութեան ընթացքին։
Ան ըսած է, թէ Ֆրանսա պիտի օգտագործէ բոլոր միջոցները՝ Նոր Գալետոնիոյ մէջ ստեղծուած կացութեան՝ արտաքին միջամտութեան հակազդելու համար։
“Ներդրումներ կատարելով՝ Պաքու ոչ միայն կը ձգտի ազդել քաղաքական բանավէճերու վրայ, օգտագործելով ճգնաժամային պահերը, ինչպէս՝ Նոր Գալետոնիոյ պարագային, այլեւ միջամտել եւ հետեւաբար, վարել ապակայունացման քաղաքականութիւն”,– ըսած է Վալս:
Ան նշած է, թէ Ազերպայճանի հռետորաբանութիւնը Նոր Գալետոնիոյ կապակցութեամբ առնուազն տարօրինակ է.
“Յայտարարութիւնները, որոնք կը պահանջեն առաւել ժողովրդավարութիւն, առաւել պաշտպանուածութիւն, կը հնչեն այնպիսի երկրէ մը, որ ժողովրդավար չէ եւ ցեղային մաքրագործումներ կատարած է Ղարաբաղի մէջ։ Սա յստակօրէն ցոյց կու տայ, որ այդ երկրին շահը ոչ թէ հոս ոեւէ մէկը պաշտպանելն է, այլ Ֆրանսային վնասելը”,– ընդգծած է նախարարը։
© 2023 Բոլոր իրաւունքները վերապահուած են։
