Արցախի Արտաքին գործոց նախարարութեան յայտարարութիւնը
«Վերջին շրջանին կրկին աշխուժացել են Լեռնային Ղարաբաղի Հանրապետութեան կարգավիճակի վերաբերեալ տարատեսակ քննարկումները, մեկնաբանութիւնները, կարծիքները, ինչը առարկայական գործընթաց է՝ հաշուի առնելով ադրբեջանա-ղարաբաղեան հակամարտութեան կարգաւորման գործընթացում այս հարցի առանցքային բնոյթը։
Ստեփանակերտը ողջունում է ադրբեջանա-ղարաբաղեան հակամարտութեան խաղաղ եւ համապարփակ լուծմանը, ինչպէս նաեւ Հայաստանի եւ Ադրբեջանի միջեւ յարաբերութիւնների կարգաւորմանն ուղղուած ամէն մի քայլ։ Միեւնոյն ժամանակ, Արցախի Հանրապետութեան Արտաքին գործերի նախարարութիւնը լիազօրուած է յայտարարել, որ Արցախի ժողովրդի եւ իշխանութիւնների պաշտօնական դիրքորոշումը մնում է անփոփոխ։
Արցախը չի լինելու Ադրբեջանի կազմում։ Հայաստանի եւ Ադրբեջանի միջեւ յարաբերութիւնների կարգաւորումը, այդ թւում՝ երկու երկրների միջեւ սահմանների հարցի լուծումը, չի կարող եւ չպէտք է կապուած լինի Արցախի Հանրապետութեան կարգավիճակի հետ։
Ադրբեջանի Հանրապետութեան տարածքային ամբողջականութիւնը ո՛չ մի առնչութիւն չունի Լեռնային Ղարաբաղի Հանրապետութիան եւ նրա կարգավիճակի հետ, որը սահմանուել է մեր երկրի ժողովրդի կողմից՝ միջազգային իրաւունքի չափանիշերին, սկզբունքներին եւ այն ժամանակ գործող խորհրդային օրէնսդրութեանը ամբողջական եւ խիստ համապատասխանութեամբ»։
