Յունուար 10-ին, Մայր Աթոռ Սուրբ Էջմիածնի մէջ, Գարեգին Բ. Ամենայն Հայոց կաթողիկոսին յանձնուեցաւ Ռուսաստանի Պատուոյ շքանշանը: Վեհափառ Հայրապետը պետական պարգեւին արժանացած է նախագահ Վլատիմիր Փութինի հրամանագրով` Ռուսաստանի եւ Հայաստանի միջեւ մշակութային-մարդասիրական կապերու զարգացման գործին մէջ ունեցած մեծ աւանդի համար:
Արարողութեան ներկայ եղած են Գերագոյն հոգեւոր խորհուրդի անդամներ, հայաստանեան թեմերու առաջնորդներ, Մայր Աթոռի միաբաններ եւ տարբեր կառոյցներու ղեկավարներ:
Մայր Աթոռ Սուրբ Էջմիածնի արարողակարգային եւ արտաքին յարաբերութիւններու բաժնի տնօրէն Նաթան արքեպիսկոպոս Յովհաննիսեանի ողջոյնի խօսքէն ետք, Հայաստանի Հանրապետութեան մէջ Ռուսաստանի դեսպան Սերկէյ Քոփիրքին կարդացած է նախագահական հրամանագիրը, ապա Ամենայն Հայոց կաթողիկոսին յանձնած Ռուսաստանի Պատուոյ շքանշանը:
Այնուհետեւ Ամենայն Հայոց Հայրապետը իր օրհնութիւնն ու պատգամը հաղորդած է ներկաներուն:
Անդրադառնալով մերօրեայ մարտահրաւէրներուն` Գարեգին Բ. ըսած է. «Ամէնքիս հոգիներն այս օրերին անհանգիստ են Բերձորի միջանցքի փակման պատճառով Արցախում ստեղծուած մարդասիրական ճգնաժամով: Աղօթում ենք, որ արդիւնաւորուեն ռուս խաղաղապահների ջանքերը` ուղղուած միջանցքի արգելքի վերացմանը եւ Արցախում տիրող աղէտալի վիճակի յաղթահարմանը: Թող Ամենակալի օգնականութեամբ մեր տարածաշրջանը վերագտնի իր խաղաղութիւնը, վերականգնուի Հայաստանի տարածքային ամբողջականութիւնը եւ միջազգային հանրութեան կողմից ճանաչուի Արցախի մեր ժողովրդի` հայրենի հողում ապահով, ազատ ու անկախ ապրելու իրաւունքը»:
