«Արցախը մե՛րն է», «Մե՛նք ենք Արցախը», «Կեցցէ՛ Արցախահայութիւնը» եւ նման կարգախօսերով Լիբանանահայութիւնը Յունուար 25-ին, հայութեան սիրտը հանդիսացող Պուրճ Համմուտի «Արին» կեդրոնի դիմացէն իր զօրակցութիւնը յայտնած է արդէն իսկ 45 օրէ ի վեր շրջափակման մէջ գտնուող, կենցաղային, մարդկային, առողջական, ջեռուցման, սնունդի, դեղորայքի եւ բազում դժուարութիւններու դէմ-յանդիման կանգնած, սակայն պայքարող եւ իր հողին կառչած Արցախահայութեան:
Սոցիալ դեմոկրատ հնչակեան կուսակցութեան (ՍԴՀԿ), Հայ յեղափոխական դաշնակցութեան (ՀՅԴ) եւ Ռամկավար ազատական կուսակցութեան (ՌԱԿ) կազմակերպած, Ազերպայճանի ծաւալած հայաթափման արշաւին դէմ եւ Արցախի զօրակցող հաւաքին՝ Լիբանանահայերը,– որոնց կարգին տիրական ներկայութիւն կազմած են աշակերտները,– իրենց բարձրացուցած պահանջատիրական պաստառներով, արտասանած ազգային շունչով բաբախող կարգախօսերով հաստատած են, որ Արցախի հայկականութիւնը անսակարկելի է, Արցախահայութիւնը Հայաստանին ու աշխարհին կապող միակ անցքի` Բերձորի միջանցքի բացումը հրամայական է, միջազգային ընտանիքը պէտք է քայլերու ձեռնարկէ Արցախի մէջ ցեղային նոր սպանդի մը առաջքը առնելու համար, շեշտելով, որ իւրաքանչիւր Լիբանանահայ կողքին կը կանգնի Արցախի մէջ զրկանքներով ապրող, սակայն տակաւին իր կորովն ու հաւատքը չկորսնցուցած Արցախցիին:
Այս առիթով Պուրճ Համմուտի բոլոր վաճառատուներն ու հաստատութիւնները փակած են իրեն դռները եւ ընդառաջած հայ քաղաքական երեք կուսակցութիւններու կոչին` մասնակից դառնալու հաւաքին:
Լիբանանի, Հայաստանի եւ Արցախի փառերգերէն ետք, ՌԱԿ-ի խօսքը արտասանած է Գրիգոր Մանուկեան, ՀՅԴ-ի կողմէ ելոյթ ունեցած է Լութֆիկ Այվազեան, իսկ Նարեկ Ղարիպեան՝ ՍԴՀԿ-ի կողմէ։
Ապա Ազգային Միացեալ վարժարանի վարչական տնօրէն Գրիգոր Էքմեքճեան կարդացած է Լիբանանի Արտաքին գործոց նախարարութեան հրապարակած հաղորդագրութիւնը, որ կը վերաբերի Բերձորի միջանցքին:
Աւարտին լիբանանահայ խումբ մը երգիչներ մեկնաբանած են «Հայեր միացէ՛ք» երգն ու «Սարդարապատ» յաղթերգը:
