Փետրուար 8-ին Ազգային ժողով-կառավարութիւն հարցում-պատասխանի ընթացքին՝ վարչապետ Փաշինեան պատասխանելով հարցումին թէ ի՞նչ դժուարութիւններ պէտք է յաղթահարուին Եւրասիական տնտեսական միութեան (ԵԱՏՄ) երկիրներու միջեւ համագործակցութիւնը աւելի խորացնելու համար, ըսած է, որ հարցը պէտք է բաժնել քանի մը շերտի։
“ԵԱՏՄ շրջանակներում շարունակում է մնալ ԵԱՏՄ երկրներում գոյութիւն ունեցող արգելքների եւ սահմանափակումների մասին արձանագրումը: ԵԱՏՄ անդամ երկրների օրէնսդրութիւններում կան դրոյթներ, որոնք հակասում են ԵԱՏՄ իրաւապայմանագրային հիմքին կամ ոգուն”,- ըսած է ան:
Ըստ վարչապետին՝ ԵԱՏՄ-ի մարմինները կ՚աշխատին այդ արգելքները վերացնելու ուղղութեամբ:
“Ի հարկէ, կան թեմաներ, որոնք շարունակում են բանակցութիւնների սեղանին լինել, եւ դրանցից մէկը գազի միասնական շուկայի ձեւաւորման մասին է, եւ այդ ուղղութեամբ, պէտք է խոստովանել, որ հսկայական աշխատանք է կատարուել: Բայց կան նրբութիւններ, որոնք դեռ կարիք ունեն հասցէագրման եւ լուծման, եւ մեր ընկալումն այն է, եւ կարծես թէ կայ ըմբռնում, որ պէտք է շարունակենք քննարկումները մինչեւ այդ հարցերի լուծումը”,– հաստատած է վարչապետը:
Հայաստան ԵԱՏՄ-ի հետ ցամաքային կապի միակ օղակ մը ունի՝ Վերին Լարսի ճամբան, ուստի մեր երկիրը շահագրգռուած է, որ ճամբաները բացուին, շեշտած է Փաշինեան:
“Այնպիսի տպաւորութիւն է, որ մեր շուրջը բոլորն ուզում են, որ ճանապարհները բացուեն, իսկ մենք դիմադրում ենք. ո՛չ, ընդհակառակը. ամենաշատը մենք ենք ուզում, որ այդ ճանապարհները բացուեն, եւ դիմադրում են միւսները: Մենք ենք ամենաշատը շահագրգիռ, որովհետեւ մենք ենք, որ 30 տարի եղել ենք շրջափակման մէջ: Ուրիշ որեւէ մէկն այդ ճանապարհների կարիքն աւելի շատ չունի՝ ո՛չ Ադրբեջանը, ո՛չ Թուրքիան, իրենք բոլոր ճանապարհների այլընտրանքներն ունեն:
Քանի որ բոլորը հասկանում են, որ մենք ամենաշատն ունենք այդ ճանապարհների կարիքը, փորձում են այդ ճանապարհները բացելու գինը մեզ համար աւելացնել: Մենք ասում ենք՝ չէ՛, եկէք այն, ինչ գրել ենք Նոյեմբերի 9-ի եռակողմ յայտարարութեան մէջ, ճշգրիտ իրականացնենք, եւ այն, ինչ չենք գրել Նոյեմբերի 9-ի եռակողմ յայտարարութեան մէջ, մի՛ վերագրէք եռակողմ յայտարարութեանը”,– ըսած է ան։
Նիկոլ Փաշինեան անդրադառնալով նաեւ վերջերս Ազերպայճանի նախագահի յայտարարութեան, ուր ան նշած էր՝ Նոյեմբեր 9-ի եռակողմ յայտարարութեան 9-րդ կէտին «միջանցք» բառ չկայ, չկայ գրուած Հայաստանի ինքնիշխանութեան որեւէ սահմանում։
“Չկայ գրուած ՀՀ օրէնսդրութեան կիրառութեան որեւէ սահմանափակում, եւ բառիս իսկական իմաստով արձանագրում եմ, որ մենք հէնց վաղը պատրաստ ենք այդ բոլոր գործողութիւնները իրականացնել եւ մեկնարկը տալ”,– շեշտած է վարչապետը:
