Մարտ 10-ին, Թումօ ստեղծարար արհեստագիտութիւններու կեդրոնը՝ Երեւանի մէջ տեղի ունեցող DigiTec միջազգային ցուցահանդէսի իր տաղաւարին հրապարակած է ԵՄ Թումօ ճարտարագիտական եւ կիրառական գիտութիւններու համալիրի ճարտարապետական նախագիծը:

Նախագիծը գիտութիւն, արհեստագիտութիւն, ճարտարագիտութիւն, մաթեմատիկա  (STEM) համակարգող համալիր մըն է Երեւանի մէջ, որ պիտի կեդրոնանայ նորարարութիւններու խթանման վրայ: Ան պիտի միաւորէ կրթութիւնն ու արդիւնաբերութիւնը` կամրջելով Հայաստանը աշխարհին։ Նետերլանտական հռչակաւոր MVRDV ճարտարապետական գրասենեակին կողմէ նախագծուած շինութիւնը նորարարական հորիզոնական կառոյց է։ Հրազդանի կիրճի եզրին կառուցուելիք շէնքը պիտի ունենայ 6 յարկ եւ 200 մեթր երկարութիւն, շուրջ 17.000 քառ. մեթր մակերես: Համալիրը պիտի բաղկանայ 300-է աւելի բաժանմունքներէ, որոնք պիտի տարածուին հսկայական սրահի մը շուրջ։ Ան շէնք մըն է՝ շէնքին ներսը ուր կը միախառնուի փակ տարածքը բացօթեայի հետ: 

Թումօ ստեղծարար արհեստագիտութիւններու կեդրոնի Զարգացման հարցերու տնօրէն Բեկոր Փափազեան այս մասին յայտարարած է. “ԵՄ Թումօ համալիրի նպատակն է կառուցել կայուն էկոհամակարգ, որը կը խթանի Հայաստանում բարձր արհեստագիտութիւնների, ճարտարագիտութեան եւ կիրառական գիտութիւնների զարգացումը։ Մեզ անհրաժեշտ է լրացնել ակադեմիայի եւ արդիւնաբերութեան միջեւ եղած բացը։ Մեզ նաեւ պէտք է ուսանողներին եւ երիտասարդ մասնագէտներին տալ գործնական ուսուցում, որը նրանց կը քաջալերի սկսել նոր ձեռնարկութիւններ եւ հզօրացնել ու նոր մակարդակի հասցնել արդէն գործողները”։

Կեդրոնին մէջ պիտի գործէ զիրար լրացնող երեք բաղադրիչ.

Կրթական եւ հետազօտական ծրագրեր. Թումօ աշխատանոցները կրթական անվճար հարթակներ են, ուր ուսանողները եւ երիտասարդ մասնագէտները, համագործակցելով տեղական եւ միջազգային արհեստագիտութեան ընկերութիւններու, ինչպէս նաեւ համալսարաններու հետ, կ՚աշխատին գիտահետազօտական ծրագրերու վրայ:

Դասախօսութեան եւ ցուցահանդէսի դահլիճներ. Կեդրոնին  մէջ պիտի ըլլան նաեւ դասախօսութեան դահլիճներ, միջոցառումներու հարթակներ, միասնական աշխատանքի եւ ուսումնական տարածքներ՝ թէ՛ անհատներու, թէ՛ ալ կազմակերպութիւններու բազմազան կարիքները հոգալու համար: Այս տարածքներուն  մէջ պիտի կազմակերպուին լայնածաւալ միջոցառումներ, ցուցահանդէսներ եւ համաժողովներ:

Աշխատանքային եւ առեւտրային տարածքներ. Նախագծուած ըլլալով որպէս բաժանելի համակարգ, ան կարելիութիւն պիտի ընձեռէ ընդունելու թէ՛ փոքր, թէ՛ ալ մեծ ընկերութիւններ: Կեդրոնի առաջին յարկը պիտի գործեն սրճարաններ, ճաշարաններ, մարզասրահներ, խանութներ եւ առեւտրական այլ տարածքներ:

Եւրոպական Միութեան կողմէ համագանձատրուող, 25 միլիոն եւրօ արժողութեամբ համալիրին մասին առաջին անգամ յայտարարուած էր 2019-ին: Անկէ ի վեր Թումօն կազմակերպած է միջազգային ճարտարապետական մրցոյթ, զոր շահած է նետերլանտական MVRDV գրասենեակը եւ սկսած է նախագծի աշխատանքը: Նոյն տարուան ընթացքին իրենց գործունէութիւնը սկսան ծրագրի հիմնական մասնիկներէն Թումօ աշխատանոցները, որոնք նոյնպէս Թումոյի ծրագրի ընդլայնման մէկ մասնիկն են եւ երիտասարդներուն կարելիութիւն կ՚ընձեռեն ձեռք բերելու STEM-ի ոլորտներու կիրառական եւ առաջադէմ հմտութիւններ:

Համալիրի շինարարութիւնը կը սկսի այս տարի: Շինութիւնը միայն մէկ մասն է աւելի մեծ յատակագծի մը, որ կ՚ընդգրկէ Թումոյի ներկայի շէնքը, արհեստագիտական եւ կրթական շարք մը կառոյցներ, ինչպէս նաեւ մեթրոյի ապագայ կայարանը Հալաբեան փողոցին վրայ։