Հայաստանի պետական սիմֆոնիկ նուագախումբը երկու համերգով պիտի ընկերակցի Անտրէա Պոչելլիին
Հայաստանի պետական սիմֆոնիկ նուագախումբը, իր հիմնադիր եւ գեղարուեստական ղեկավար Սերգէյ Սմբատեանի ղեկավարութեամբ, Նոյեմբեր 27-ին եւ Դեկտեմբեր 2-ին երկու համերգով պիտի ընկերակցի աշխարհահռչակ իտալացի թենոր Անտրէա Պոչելլիին՝ Յորդանանի եւ Արաբական Միացեալ Էմիրութիւններու մէջ։
Առաջին համերգը տեղի պիտի ունենայ Նոյեմբեր 27-ին, Յորդանանի Փոքր Փեթրա պատմական վայրին մէջ, ուր բացօթեայ ելոյթը նախատեսուած է մայրամուտին։ Երկրորդը պիտի կայանայ Դեկտեմբեր 2-ին, Ապու Տապիի Եաս կղզիին վրայ գտնուող «Etihad Arena» համերգասրահին մէջ։
Ապու Տապիի համերգով պիտի բացուի «Yasalam Classics» երաժշտական նոր շարքը, որ կը կազմակերպուի Ֆորմիւլ 1-ի Ապու Տապիի Մեծ մրցանակի մրցումներուն ընդառաջ։
Երկու ելոյթներն ալ կը նախատեսուին Պոչելլիի «Romanza» ձայնասկաւառակին 30-ամեակին նուիրուած համաշխարհային համերգաշրջանին ծիրէն ներս։ Աշխարհի տարածքին շուրջ 20 միլիոն օրինակով վաճառուած այս ձայնասկաւառակը մեծ դեր ունեցած է իտալացի երգիչին միջազգային ճանաչման մէջ։
Այս համերգները միջազգային երաժշտական բեմերու վրայ Հայաստանի պետական սիմֆոնիկ նուագախումբին գործակցութիւններու շարքին նոր հանգրուան մը պիտի ըլլան։

