Ապրիլ 28-ին, Իտալիոյ մէջ Հայաստանի դեսպան Ծովինար Համբարձումեան իտալացի գրող, լրագրող Ռենաթօ Ֆարինային յանձնած է Հայաստանի նախագահի հրամանագրով շնորհուած երախտագիտութեան շքանշանը՝ երկու երկիրներու միջեւ բարեկամական յարաբերութիւններու ամրապնդման եւ զարգացման, համամարդկային արժէքներու պաշտպանութեան գործին մէջ ունեցած ներդրումներուն համար։
Արարողութեան ներկայ եղած են շուրջ երկու տասնեակ հիւրեր՝ Իտալիոյ ներկայի եւ նախկին բարձրաստիճան պաշտօնատարներ, լրագրողներ, հասարակական գործիչներ։
Տիկին Համբարձումեան իր ելոյթին բարձր գնահատած է Ֆարինայի կարեւոր դերակատարութիւնը՝ Հայաստանի, հայկական հարցի եւ հայ մշակութային արժէքներու վերաբերեալ տեղեկութիւնները իտալացի հասարակութեան ներկայացնելուն համար։ “Թէ՛ նախապէս իբրեւ երեսփոխան եւ թէ՛ ներկայիս որպէս ազատ լրագրող Ֆարինա երբեք չէ զլացած իր աջակցութիւնը՝ հայ ժողովուրդին։ Ան անտեսելով սպառնալիքները եւ խոչընդոտները լուսաբանած է Արցախեան պատերազմը եւ այսօր ալ կը շարունակէ ազերպայճանական յարձակումներուն վերաբերող իրողութիւնները լուսարձակի տակ առնելու իր աշխատանքը”,– շեշտած է դեսպանուհին։
