Յունիս 13-ին, Եւրոպական յանձնաժողովը եւ Եւրոպա Նոսթրա կազմակերպութիւնը յայտարարած են 2023-ի Եւրոպական ժառանգութեան մրցանակներու / Եւրոպա Նոսթրայի մրցանակներու թեկնածուներու անունները: Այս տարի 21 երկիրներէ մշակութային ժառանգութեան ոլորտի 30 նշանակալից աշխատանք արժանացած են Եւրոպայի գերագոյն պարգեւին: Անոնց շարքին է «Հնագիտական հետազօտութիւններ՝ ուղղուած Երերոյքի պահպանութեան» ֆրանքեւհայկական ծրագիրը։ Երերոյքի (Հայաստան) վաղ քրիստոնէական եւ միջնադարեան համալիրը հանգամանօրէն ուսումնասիրուած է 2009-էն մինչեւ 2021: Ուսումնասիրութիւնը կատարուած է բազմառարկայական (multidisciplinaire) եւ շրջակայ միջավայրին հանդէպ յատուկ ուշադրութիւն ցուցաբերող նորարար մօտեցումներով: Աշխատանքներուն մասնակցած են տարբեր երկիրներէ բազմաթիւ մասնագէտներ։
Դափնեկիրները իրենց պարգեւները,– որոնք կը գանձատրուին Եւրոպական յանձնաժողովի «Ստեղծարար Եւրոպա» ծրագրի եւ Եւրոպական Միութեան կողմէ,– պիտի ստանան Սեպտեմբեր 28-ին, Վենետիկի Փալացցօ տէլ Չինեմայի մէջ կայանալիք Եւրոպական ժառանգութեան մրցանակաբաշխութեան ընթացքին։
Բացի այս պարգեւներէն, կայ նաեւ «Հանրութեան ընտրութեան մրցանակ»-ը, որու յաղթողը պիտի ստանայ յաւելեալ 10.000 եւրօ պարգեւ։ Այս մրցոյթը տեղի կ՚ունենայ առցանց քուէարկութեամբ։
Յաղթական 30 ծրագրերուն ծանօթանալու եւ քուէարկելու համար այցելել՝
