Հայաստանի խորհրդարանի նախագահ Ալէն Սիմոնեան.
«Ընդդիմութիւնը չբարեհաճեց ներկայ գտնուել Խաչատրեանի հոգեհանգստին… դուք քաղաքական դիակ էք»
Հայաստանի Ազգային ժողովի նախագահ Ալէն Սիմոնեան՝ մեղադրելով ընդդիմութիւնը որ ներկայ չէ գտնուած Յունիս 21-ին մահացած երեսփոխան Վիգէն Խաչատրեանի հոգեհանգստեան արարողութեան եւ յուղարկաւորութեան, Յունիս 24-ին Դիմագիրքի իր էջին մասնաւորապէս գրած է.
«Այսօր մենք վերջին հրաժեշտը տուեցինք Ազգային ժողովի պատգամաւոր Վիգէն Խաչատրեանին, թէ ով էր եւ ինչ ներդրում ունէր Խաչատրեանը Հայաստանի քաղաքական դաշտում տասնամեակներ շարունակ՝ չեմ էլ ուզում խօսել, մահացել էր ընտրուած պատգամաւոր, եւ Ազգային ժողովի ընդդիմութեան ո՛չ մի ներկայացուցիչ չբարեհաճեց ներկայ գտնուել ոչ հոգեհանգստին, ոչ յուղարկաւորութեան:
(…) Դուք պարտուել էք, պարտուել էք ու պարտուելու էք, որովհետեւ չէք հասկանում պարզ, հասարակ մարդկային բաներ, ու վախենում կորցնել այն, ինչ վաղուց չունէք, դուք մեզ համար քաղաքական ընդդիմախօս չէք, դուք մեր եւ ժողովրդի համար քաղաքական բեռ էք, որը մենք կրում ենք երեւի որպէս պատիժ՝ անցած տարիների մեր սխալների համար: Դուք քաղաքական դիակ էք, ում հոգեհանգստին մենք ամէն օր ներկայ ենք գտնւում:
Աստուած ձեզ դատաւոր»։
