Յունիս 13-ին, Ժընեւի հանրայայտ Վիքթորիա դահլիճին (Victoria Hall) մէջ տեղի ունեցած է երկար սպասուած դասական երաժշտութեան երեկոյթը՝ նուիրուած Մարիա Գալլասի 100-ամեակի յոբելեանին, մասնակցութեամբ՝ աշխարհահռչակ թենոր Փլասիտօ Տոմինկոյի, նշանաւոր հայ երգիչներ Վարդուհի Խաչատրեանի (մեցցօ–սոփրանօ) եւ Յովհաննէս Այվազեանի (թենոր), Իտալիոյ Փեզարօ քաղաքի Orchestra Sinfonica Rossini-ի՝ ֆրանսացի Ֆրետերիք Շալէնի խմբավարութեամբ։
Համերգը կազմակերպած է Զուիցերիոյ «Աւետիս» մշակութային կազմակերպութիւնը, որուն հիմնադիր տնօրէնուհին եւ գեղարուեստական ղեկավարն է Վարդուհի Խաչատրեան։
Գալլասին նուիրուած եւ անոր երգացանկէն ընտրուած օրուան յայտագիրը կազմուած է մասնակից արուեստագէտներու միատեղ ուժերով։
Աւարտին, Տոմինկօ հիացական կարծիք յայտնած է թէ՛ կազմակերպչական աշխատանքին եւ թէ՛ հայ երգիչներու կատարողական բարձրորակ արուեստին մասին։
