Արցախի «Արդարութիւն» խմբակցութեան երեսփոխանուհին Դիմագիրքի իր էջին գրած է.
«Արցախի Հանրապետութեան քաղաքացի Վագիֆ Խաչատրեան 120.000 Հայերի հաւաքական կերպարն է, որից իրականում սարսափում է Ալիեւը: Ադրբեջանի բռնապետը՝ Կարմիր Խաչի միջոցով Հայաստանի Հանրապետութիւն բուժման նպատակով տեղափոխուող Վագիֆ Խաչատրեանին դաւադրաբար առեւանգել է: Ընդամէնը երկու օր առաջ Հայաստանի, Ռուսաստանի եւ Ադրբեջանի Արտաքին գործերի նախարարները գոհունակութեամբ յայտարարեցին, որ յանգել են համաձայնութեան եւ պէտք է սկսել Հայերի եւ Ադրբեջանցիների համատեղ ապրելու գործընթացը:
Իսկ էլ ինչ ապացոյցներ են պէտք Հայաստանի եւ Ռուսաստանի իշխանութիւններին տեսնելու եւ հասկանալու համար, որ Ադրբեջանցին նենգ է, արնախում ու ՀԱՅԻՆ ոչնչացնելու համար ոչ մի բանի առջեւ չի կանգնելու եւ իր համար առ ոչինչ է որեւէ համաձայնութիւն, նոյնիսկ իր ստորագրութեամբ վաւերացուած, ինչպէս օրինակ 2020 Նոյեմբերի 9-ի յայտարարութիւնը:
Ռուսաստանի Դաշնութիւնը, որ մեր տարածաշրջանում խաղաղութեան եւ կայունութեան գլխաւոր դերակատարն է, անյապաղ պէտք է կատարի իր ստանձնած պարտաւորութիւնները: Դուք իրաւունք չունէք թոյլ տալու Ալիեւին իր յանցագործ մտադրութիւնները իրականացնելու»։
