Արմէն Գէորգեան

Սթրազպուրկի մէջ, Եւրոպայի խորհուրդի խորհրդարանական վեհաժողովի (ԵԽԽՎ) լիագումար նիստին ելոյթ ունենալով, Հայաստանի ներկայացուցիչ Արմէն Գէորգեան յայտարարած է, թէ ԵԽԽՎ-ն պէտք է ինքզինքը բիւրեղացնէ եւ դադրեցնէ բռնատիրական պետութիւններու անդամակցութիւնը։ 

“Տարօրինակ է Ազերպայճանի ներկայացուցչին՝ մարդկային իրաւանց եւ ժողովրդավարական կառավարման վերաբերեալ զեկոյց ներկայացնելը (*)։ Աւելի՛ն, զեկոյցը կը ներկայացնէ երկրի մը իշխող կուսակցութեան անդամը, որ տակաւին երէկ Լեռնային Ղարաբաղի մէջ բնիկ հայ բնակչութիւնը ամբողջութեամբ ցեղային զտման ենթարկեց”,– ըսած է Գէորգեան։

Ան նշած է, որ աջ ծայրայեղական գաղափարախօսութիւնները բաղկացած են ազգայնական, այլատեաց, ռազմատենչ եւ բռնատիրական տրամադրութիւններէ, որոնք տասնամեակներէ ի վեր առկայ եղած են Ազերպայճանի մէջ։

“Մենք չկրցանք կանխել 100.000 Հայերու բռնագաղթը՝ ռազմական ուժի ներքոյ՝ դաժան բռնապետ Իլհամ Ալիեւի կողմէ։ Սա խայտառակութիւն է Եւրոպայի համար”,– շեշտած է ԵԽԽՎ-ի մէջ Հայաստանի պատուիրակը։

_______

(*) – Նշենք, թէ ԵԽԽՎ-ի աշնանային նստաշրջանի լիագումար նիստին՝ «Աջ ծայրայեղական գաղափարախօսութեան Եւրոպայի յղած մարտահրաւէրը ժողովրդավարութեան եւ մարդկային իրաւանց նկատմամբ» նիւթին շուրջ քննարկման ընթացքին զեկոյց ներկայացուցած է ԵԽԽՎ-ի մէջ ազերպայճանական պատուիրակութեան ղեկավար Սամատ Սէիտով։