Գերմանիոյ Հայոց թեմի կազմակերպութեամբ, Նոյեմբեր 10-ին Քէօլնի «Domforum» հանդիսասրահին մէջ տեղի ունեցած է հայ անուանի երգահաններ Ալեքսանդր Սպենդիարեանին (1871–1928) եւ Լազար (Ղազարոս) Սարեանին (1920–1998) նուիրուած համերգ մը։

Երեկոյթին յայտագիրը կազմուած էր երկու երաժիշտներու ծանօթ ու անծանօթ շարք մը ստեղծագործութիւններէն. փայլուն կատարումներով հանդէս եկած են Սիփան Օլահ (թենոր, Լոնտոն), Անուշ Նազարեան (սոփրանօ, Քէօլն), Մարիա Փալազեան (դաշնակ, Լոնտոն), Յակոբ Մուրատեան (բարձրասրինգ (hautbois), Լոնտոն), ինչպէս նաեւ լարային քառեակը Քէօլնէն (Լիւսի Յովհաննիսեան՝ առաջին ջութակ, Աստա Մամիկոնեան՝ 2-րդ ջութակ, Սարգիս Սարուխանեան՝ ալթo, Տեմիթրի Գորնովսքի՝ թաւջութակ)։

Համերգին բացումը կատարած են Domforum-ի փոխտնօրէն Վիլ Ռայնէր եւ Առաջնորդարանի քարտուղար Սայեաթ սարկաւագ Պօյաճեան։

Համերգի աւարտին Թեմի առաջնորդ Սերովբէ եպիսկոպոս Իսախանեան շնորհակալութիւն յայտնած է բոլոր երաժիշտներուն՝ բարձրակարգ երգ ու երաժշտութեան միջոցով հայ մշակոյթէն պատառիկներ ներկայացնելնուն համար։

Ձեռնարկի կազմակերպութեան աջակցած էին Քէօլնի Հայ Համայնքը, Քէօլնի կաթողիկէ Bildungswerk-ը, Լոնտոնի Klingen երգչախումբն ու մշակութային ընկերակցութիւնը, Ալեքսանդր Սպենդիարեանի եւ Մարտիրոս Սարեանի տուն-թանգարանները՝ Երեւանէն։

Լուսանկարները՝  Էտմոն Հախնազարեանի