Գարեգին Բ. Ամենայն Հայոց կաթողիկոսի նախագահութեամբ Հայաստանի եպիսկոպոսները եւ թեմակալ առաջնորդները հանդէս եկած են ստորեւ տրուած յայտարարութեամբ՝ Արցախի Հանրապետութեան գերեվարուած ռազմաքաղաքական ղեկավարներու իրաւունքներու ոտնահարման դէպքերու վերաբերեալ։
«Օրեր առաջ ադրբեջանական քարոզչամեքենան յանցաւոր չարախնդութեամբ եթեր հեռարձակեց Արցախի Հանրապետութեան գերեվարուած ռազմաքաղաքական ղեկավարների հետ պարտադրուած հարցազրոյցների հիման վրայ յօրինուած, յառաջիկայ Մարտ 28-ին ցուցադրութեան նախատեսուած, այսպէս կոչուած «Անտիտեռոր» վերնագրուած ֆիլմի ծանուցումը:
Արցախի առեւանգուած ու պատանդ առնուած ղեկավարների նկատմամբ ցուցաբերուող նման քայլը կրկին անգամ բացայայտում է ադրբեջանական իշխանութիւնների որդեգրած քաղաքականութեան հակահայկական էութիւնը:
Ամօթալի նմանօրինակ գործողութիւններով ուղղակիօրէն ոտնահարւում եւ անարգւում են միջազգայնօրէն ճանաչուած մարդկային իրաւունքները։ Կրկին անգամ փորձ է արւում գերեվարուած անձանց խոցելիութիւնը օգտագործելու անբարոյ գործելաոճի միջոցով ապակողմնորոշել միջազգային հանրութիւնը եւ տասնամեակներ շարունակ ադրբեջանական բռնութիւնների ու գոյաբանական սպառնալիքների դէմ Արցախահայութեան մղած ինքնորոշման արդար պայքարը ներկայացնել որպէս ահաբեկչութիւն:
Գերեվարուած հայորդիներին նուաստացնող բացայայտ այս գործողութիւնները կրկին ակներեւ են դարձնում խաղաղութեան հասնելու Ադրբեջանի ղեկավարութեան հաւաստումների կեղծ ու նենգամիտ բնոյթը:
Խաղաղութիւնը չի կարող կերտուել հայ ժողովրդի արժանապատւութեան ոտնահարման, ատելութեան ու թշնամանքի շարունակական սերմանման եւ Արցախահայութեան արդար իրաւունքների նկատմամբ անյարգալից դրսեւորումների պայմաններում:
Հայաստանի իշխանութիւնները “խաղաղութեան դարաշրջան” կերտելու իրենց ձգտումներում առաջնահերթօրէն պէտք է հասնեն Ադրբեջանի կողմից նմանօրինակ յարձակողական ու թշնամական գործողութիւնների բացառմանը եւ բոլոր հայ գերիների առանց պայմանի ազատ արձակմանը:
Կոչ ենք ուղղում միջազգային հանրութեան, մարդասիրական առաքելութիւն իրականացնող կազմակերպութիւններին` համարժէք կերպով հակադարձել հայ գերիների նկատմամբ Ադրբեջանի դրսեւորած յիշեալ զազրելի գործողութիւններին եւ առաւել գործնական ու ազդու միջոցներ կիրառել հայ գերիների իրաւունքների պաշտպանութեան եւ հայրենիք շուտափոյթ վերադարձի ուղղութեամբ:
Աղօթում ենք Երկնաւոր Տիրոջը, որ զօրացնի բոլոր նեղեալներին ու գերեալներին` յաղթահարելու համար մարդկային չարիքի ու արհաւիրքի պատճառած զրկանքներն ու տառապանքները:
Թող Ամենազօր Աստուած օրհնի մեր երկիրն ու ժողովուրդը եւ խաղաղութիւն սփռի համայն աշխարհում ու մեր տարածաշրջանում»:
© 2023 Բոլոր իրաւունքները վերապահուած են։
