Թիխոն Ծիատքօ

Մոսկուայի «Crocus City Hall» համերգասրահին դէմ Մարտ 22-ին գործուած ահաբեկչական արարքէն անմիջապէս ետք, լրատւութեան առաջին հոսքին մէջ Ռուսաստանի՝ ընդդիմադիր «Տոժտ» հեռատեսիլի կայանը դէպքին վայրէն ականատեսներու վկայութիւններու տեղ տալու ընթացքին՝ ներկայացուցած է ոմն Էմինը։ Վերջինս ինքզինք համերգի ձայնաւորման պատասխանատու ներկայացնելով ըսած է, թէ ըլլալով Ազերպայճանցի՝ ծանօթ է հայերէնին եւ պնդած, թէ՝ ահաբեկիչները իրենց միջեւ հայերէն կը խօսէին ու մարդիկ գնդակահարելու ընթացքին ալ հայերէն կը հայհոյէին…։  

Անոր այս զրպարտութիւնը բնականաբար մեծ յուզում պատճառած է Հայութեան։  Ռուսաստանի մէջ հայաստանի դեսպանութիւնը իր խոր մտահոգութիւնը յայտնած է հեռարձակման ընթացքին տեղի ունեցած այս միջադէպին կապակցութեամբ: «Վրդովեցուցիչ կը համարենք նման տեղեկատւութեան նպատակադրեալ տարածումը, որ չի համապատասխաներ իրականութեան եւ ուղղուած է Ռուսաստանի մէջ հակահայ տրամադրութիւններ բորբոքելու»,– ըսուած է դեսպանութեան յայտարարութեան մէջ:

Իսկ աւելի ուշ, «Տոժտ»-ի գլխաւոր խմբագիր Թիխոն Ծիատքօ ներողութիւն խնդրած է հայոց հասցէին հնչած սոյն անհիմն մեղադրանքներուն համար։

“Մինչեւ հաղորդման պահը, նախնական հարցազրոյցի ընթացքին, այդ մարդը այդպիսի որեւէ բան չէր ըսած: Երբ մենք լսեցինք նման անապացոյց մեղադրանքներ, հաղորդավարը շեշտեց, որ այդ անապացոյց է, մենք դադրեցուցինք հաղորդումը ու այնուհետեւ լրատւութենէն ալ կտրեցինք տուեալ հատուածը: Ներողութիւն կը խնդրեմ «Տոժտ»-ի հաղորդման ընթացքին նման անապացոյց մեղադրանքներ հնչած ըլլալուն համար”, – նշած է Ծիատքօ: