Բեմադիր Զառա Ճիանի «I will revenge this world with love. S. Paradjanov» («Ես այս աշխարհէն վրէժխնդիր պիտի ըլլամ՝ սիրով. Ս. Փարաճանով») վաւերագրական ֆիլմը ընդգրկուած է Վենիտիկի 81-րդ միջազգային փառատօնի VENICE CLASSICS մրցութային բաժնին մէջ: Փարաճանովին նուիրուած ֆիլմին անդրանիկ ցուցադրութիւնը տեղի կ՚ունենայ Սեպտեմբեի 6-ին, Վենետիկ: Ներկայ պիտի ըլլան թէ՛ ժապաւէնին հերոսները, թէ՛ ալ ստեղծագործական ու արտադրողական կազմը, Իտալիոյ մէջ Հայաստանի դեսպանութեան եւ Մխիթարեան Միաբանութեան ներկայացուցիչներ, հրաւիրեալներ:

Ֆիլմին ստեղծագործական կազմը Օգոստոս 28-ին կը մեկնէր Վենետիկ։

Օգոստոս 27-ին, Փարաճանովի տուն-թանգարանին մէջ կազմակերպուած մամլոյ ասուլիսին, սոյն ժապաւէնի բեմադիր Զառա Ճիան ըսած է, թէ ֆիլմին՝ VENICE CLASSICS-ի մրցութային բաժնին մէջ ընդգրկուիլը իրենց համար անակնկալ էր եւ թէ դժուար է նկարագրել այն զգացումները, զորս ապրած են լուրը իմանալու ժամանակ։

Ֆիլմը ֆրանքեւհայկական միատեղ արտադրութիւն է, որուն մասնակցած է նաեւ Մեծն Բրիտանիա: